入行7年終圓紅館夢 AGA完騷想上武當學功夫

  AGA(江海迦)將於4月舉行首個紅館演唱會《AGA Round Midnight Live 2020》 ,她感激恩師舒文入行7年來的鞭策,而父母及過世的姐姐Gina,亦是她的精神支柱,陪伴她一直追夢。近期為了綵排及鍛煉身體,AGA聖誕節和新年等假期一樣冇休息,雖然這段日子很艱苦,但她完騷後竟不是去hea休息,反而想上武當山學功夫,認真估佢唔到!

  得知消息後,AGA第一時間同屋企人分享喜訊,「最大感受係爸爸媽媽,爸爸一路培養我,我幾姐妹當中得我一個繼承到佢,其實我媽咪想過做空姐,我幫佢實現咗,今次又幫爸爸完成夢想,爸爸本來有機會喺日本同玉置浩二一齊出道做歌手,當時經理人撞車過身,冇咗呢個機會,o依家佢睇到我上到紅館更大感受。(父母開心過你?)係呀!啱啱佢哋(父母)話去咗隧道口同我張演唱海報影相。」除了父母,跟AGA感情好到似孖生姐妹的姐姐Gina,雖然已離開人世,但她認為姐姐一定很替她開心,更會為她打氣話:「操fit啲囉!」

  忙完年多的巡迴演唱會再加今次紅館處女騷後,AGA未有想過大玩特玩,或者勁hea休息,反而選擇一些艱苦的學習之旅,「想做到未做嘅事,其中去武當山,學太極嗰啲,我細個其實有學過功夫,我好鍾意李小龍、葉問、黃飛鴻,或者去日本進修日文,我試過嗰啲亞洲廢人嘅假期,第二日已經唔得。」

撰文:杜淑霞 攝影:李維隆

髮型:Gary Sun from [email protected]

化妝:Vanessa Wong 服裝:Lane Crawford

場地:柏寧酒店

hd