星味蓋過名模媽咪馬詩慧 王麗嘉Shopping惹途人喪目及

  馬詩慧(Janet)幼女王麗嘉(Irisa)遺傳晒父母的最強DNA,年僅24歲便擁有一副天使面孔魔鬼身材,難怪一畢業就入行做Model。日前,兩母女約埋去尖沙咀睇衫,其間散發出濃濃星味的Irisa,引來不少男士喪目及,反觀媽咪則掛住跟同行後生女密密傾,似乎冇乜人留意到佢。採訪:李維隆

  馬詩慧與丈夫王敏德育有兩女一子,兩位千金王曼喜和王麗嘉均盡得父母的優良基因,不但有超模級的高挑身形,細女Irisa更擁34D驕人上圍,令身邊朋友紛紛嗌羨慕,惜目標去外國行騷的她,一直想做「縮胸」手術,仲話:「試過減肥瘦咗,個胸都唔細,我都想細啲,但唔到我控制。」話雖如此,她卻經常於社交網大方派「肉」照,惹來爸爸王敏德不滿,但Janet則開通得多,之前仲幫愛女影出浴照O添!

  日前傍晚5點,兩母女孖咇去尖沙咀K11 Musea逛潮店,同行還有一對後生仔女。4人入商場前,好似「小學雞」咁坐喺公園打發時間,不過他們並非圍埋打機,而是各自低頭撳手機,難為夾喺中間嗰位仁兄繞埋手、頭岳岳,真係睇見都老尷!隔咗一陣,Irisa終於放低部電話,同男友人傾咗兩句,惜好快她又重拾手機狂篤;至於媽咪Janet就忽然「睇相佬」上身,右手舉起「屈指一算」,係咪算到Hea夠呢?

  未幾,一行人便起行到潮店,心境年輕的Janet同大家都完全冇代溝,沿途跟同行後生女密密斟,反而囡囡全程做低頭族,而穿Sharp黃色Jumpsuit的Irisa,雖然心口包到冚,但Fit爆身形及靚樣仍吸引不少男士目光。最後,眾人於潮店逛咗陣,似乎都冇睇啱嘢便走了。


hd