唔帶口罩綵排舞台劇 陳志雲讚亞視林文龍有創意

  最近TVB、ATV人事變動,TVB董事局主席陳國強退下火線,藝員林文龍就華麗轉身出任亞視副總裁!曾經係TVB總經理嘅陳志雲(Stephen)梗係有留意,他笑說:「最估唔到林文龍對呢方面感興趣,佢第一炮搞得幾好,正當個個喺疫情下唔敢搞新春團拜時,由佢帶領亞視去做,至少有好多傳媒報道!」不過,陳志雲最關注嘅,當然係他跟區嘉雯、倪秉郎主演嘅舞台劇《生死裁決》,能否如期喺2月13至23日於西九文化區藝術公園上演,因為要到公演前一刻先通知,十分被動。採訪:方騫平

  由於場地問題,《生死裁決》能否如期演出,還有待決定!不過,陳志雲採取審慎樂觀態度,台前幕後如常進行最後排練:「因應疫情,暫時閉館到2月9號,正常我哋喺10號入景,o依家都未被通知下一步會點。」

  問到會否怕於密閉空間演出有風險?陳志雲覺得最重要大家都冇返過內地,而觀眾席跟演員都有段距離,「平日我都冇戴口罩排戲,另外,有場戲講『小三』區嘉雯喪鬧我『懶仁慈』,如果佢有武漢肺炎,係咁對住我噴口水,咁我一定中招!不過,呢個角色好似我,尤其係好心做壞事變咗賴嘢位,所以愈演愈真,相當投入。」

  對於陳國強辭任TVB董事局主席退休,陳志雲相信架構及主要做執行人都變定咗,TVB唔會變天,不過,他提示一吓:「唔係踩TVB,o依家文化同風氣係冇大台,不論任何工作崗位唔會我叻晒,我大晒,我得晒!唔係你死我活,一定係要共存共融先得,要互補不足,如果按以前思維做嘢,船會慢慢沉,但又唔會墮得太快,始終爛船都有三分釘!」另外,他又大讚林文龍擬將亞視「閉關」5個月,重整旗鼓做法好唔錯,同他諗法相同,至少大家會有期待。


hd