劫後餘生冇晒安全感 黎芷珊狂抹廁板「保命」

  54歲的黎芷珊剛過了一個難忘生日,一切由1月尾踏上「疫輪」鑽石公主號而起。她苦笑說:「死過翻生後仲要被歧視,劫後餘生仲鬱出一個好冇安全感嘅心理病,但有呢啲擦身而過嘅經歷都幾新鮮,更珍惜身邊嘅一切!」採訪:方騫平 攝影:譚壹致

場地:HAKU Curated By Hideaki Matsuo



  經過一個月自我隔離,雖然黎芷珊喺朋友力說下「出關」慶生,但冇咗以前嗰份安全感,堅持去埋呢幾場party又要再收埋自己:「可能得自己一個人住,經過呢件事變得好冇安全感,隔離期間日日有留意疫情資訊,覺得唔出街最安全,好擔心出面環境。就算獨留家中都好擔憂,蓋上廁板沖廁後,每次使用洗手間前都要再用1:99漂白水再抹一次廁板。」

  清潔做到足嘅芷珊仍然非常擔心,「有時冇嘢做會諗埋一邊,同埋應該喺睇醫生前同屋企人講低銀行戶口、保險、提款卡密碼等,萬一我有事,佢哋攞唔到我啲錢咪死,仲要交條門匙畀前度張達倫嚟照顧兩隻愛貓,隔離期間我悶到日日同貓傾偈,講吓『早晨呀!』好低能無聊㗎,冇人同我講嘢嘛,都要講吓嘢㗎,以前我唔鍾意講電話,嗰段時間朋友傳訊息畀我,我反而會要求通電話,想郁吓個口,悶到癲咗,好似有心理病咁,不過,又唔太想出街,覺得冇必要,去完要由頭洗到落尾好煩,出面好唔安全,唔想出去,所以食埋呢幾餐生日飯,都要留守屋企先。」

  問到生日願望係咪搵個男友照顧?芷珊姐姐即說:「都係喎,但竟然唔記得許呢個願,生日願望反而好宏觀,真係想疫情快過,o依家生意、工作受影響,心情又唔好,喺屋企都擔心,眼見鑽石公主號有確診者死亡個案都好難過,覺得世事無常,會好好珍惜身邊嘅一切!」


hd