34D張秀文收埋身材做節目 阿Bob黑口黑面冇晒癮

  由林盛斌(Bob)及張秀文主持的TVB遊戲節目《你估我唔到》每集會以唔同cosplay現身,對於大部份造型都唔性感,埋沒了張秀文34D養眼身材!當事人話一啲都唔可惜,正好畀大家留意返她的內涵,但拍檔阿Bob就唔係咁睇,佢直言好冇癮。採訪:方騫平

  《你估我唔到》由兩位主持人走勻電視城錄影廠,尋找嘉賓睇日本短片即興玩遊戲考驗「腦力」!張秀文最難忘係劉佩玥(阿Moon):「佢蠢蠢哋,蠢得嚟又幾可愛,最頂唔住佢由頭到尾都好賴皮,不停講:『吓?點解呀,畀我啦……』所以攞咗好多獎品,呢啲女仔真係一流,我就係少咗佢呢啲嗲嘢。」被冧暈咗的Bob附和:「佢話玄彬唔夠林盛斌好,所以一定要醒佢多份禮物啦!呢啲女仔o氹死人。」至於煒哥外表好優雅,原來玩得好放;朱晨麗就黐黐哋,不受控,Bob笑說:「佢好代入《大醬園》,去到主景話係佢屋企,仲招待我哋入去,完全反客為主。」

期待逼爆超人衫

  問到阿Bob鍾意阿Moon嗲聲嗲氣定似秀文咁好身材嘅女仔?阿Bob即說:「一定係要身材啦,Moon一定唔夠秀文勁,平日喺私人宴會見到秀文着性感晚裝,但節目入面就包到實,冇晒癮!」張秀文指阿Bob對她冇晒邪念:「唔怪得佢錄影時猛話好眼瞓啦,原來冇刺激。佢對我仲客氣好多,有時叫佢一齊自拍,佢就黑面hea答:『影乜鬼呀,嗱嗱聲返去換衫啦!』」不過,阿Bob預告兩人稍後會着超人衫,呢件衫陳敏之曾經着過,所以着喺張秀文身上有逼爆感覺,好勁,亦好期待,張秀文坦言條拉鍊好難拉。


hd