霉足四年終於有運行 馮允謙好想寫歌畀Sammi

  兩年前轉投東亞唱片嘅馮允謙(Jay)雙喜臨門,除推出新碟《Detour》外,年初仲勇奪十大中文金曲的「CASH最佳創作歌手獎」。霉咗近4年,Jay對於絕地反彈覺得好夢幻:「呢隻專輯足足等咗3年零8個月,等到有啲心灰意冷,好彩雨過天晴,o依家仲得到Sammi鼓勵,信心慢慢返嚟,心情勁興奮。」採訪:方騫平         髮型:Tim [email protected]

化妝:Maggie Lee         服裝:ithk         場地:重慶劉一手火鍋

  新碟《Detour》主題為「旅程」,Jay之前曾經歷過一段事業低潮期,零工作兼零收入,個人變得好頹,冇晒人生目標:「當時覺得唔知仲會唔會有唱片公司簽我呢?日日唔知為乜咁做創作同健身keep住狀態,慶幸喺低潮時學會編曲,去旅行散心時又創作咗40幾首歌,其中5首收錄喺專輯入面,總算冇白費心機。」Jay坦言見到張實體碟好感動,「尤其有陳詠謙做音樂總監,王菀之有份作曲,仲有好好嘅宣傳團隊,同埋好似屋企人咁錫我嘅經理人林珊珊及老闆林建岳,每首歌都做得好好。」

讚好Sammi

  之前Jay出席公司飯局,同場有老闆及鄭秀文等,提到Sammi,Jay讚不絕口,「Sammi好關心新一輩歌手,因為我有啲歌唔大路,於是問吓佢意見,佢叫我做番自己version,自然會吸納番知音。難得有機會同Sammi傾偈,感覺好似發緊夢咁,尤其哥哥係佢Fans。我梗係有送碟畀佢啦,希望佢會聽,如果將來有機會度身訂造首好歌畀佢更good,好想寫隻快版情歌畀佢,因為佢跳舞好好睇。」


hd