新歌惡搞「史前」偶像 ERROR想同BTS Crossover

  由ViuTV《全民造星》衍生的組合ERROR推出了新歌《我們很帥》,為切合「騎呢cam爆男子組合」定位,宣傳照中四子惡搞史前偶像,戴上假髮化身2001年《流星雨》時期的F4,相當爆笑:「我哋要殺埋嗰班大少女,希望每個年代嘅女士都會鍾意我哋,唔係只得年輕人。」採訪:方騫平 化妝:Kinny Lee 髮型:Terrence Chan @HAiR 造型:Felix Wong



  ERROR成員193(郭嘉駿)、保錡(吳保錡)、肥仔(梁業)及阿Dee(何啟華)分別扮成周渝民(仔仔)、朱孝天、言承旭、吳建豪,阿Dee帶笑說:「當日我哋搵影宣傳相資料時,本身睇緊韓國BIGBANG,點知有F4啲相走咗出嚟,後來憑感覺設計咗呢張相,原來F4真係好襯我哋呀!仔仔係廢㗎嘛,好貼切193囉,朱孝天識音樂似保錡,言承旭有男人風範,幾咁Man幾咁有氣勢,每次望到大佬肥仔背影就諗起道明寺,而我眼細最似吳建豪。」

  聽畢阿Dee介紹,193即反駁他:「喂!你唔好咁攻擊我喎!仔仔Fans,唔該喺IG留言鬧爆佢!」阿Dee即戴返個頭盔補充:「我係評論初出道時對仔仔嘅感覺,當時佢除咗外貌,乜才能都冇!不過,經過多年嚟娛樂圈浸淫,佢哋o依家全部好有才華,我哋反而好似初出道嘅佢哋。」保錡突然彈咗句:「我同佢哋方向一樣,出道係為咗想賺錢,佢哋o依家發到傻咗,我哋好想似佢哋咁樣,希望連台灣人都留意我哋,下一步我哋會同Michael Jackson、BTS、G-DRAGON等Crossover。」193反問:「同Michael Jackson係咪陰間同陽間Crossover?」保錡就話係Crossover啲demo啫,佢有好多歌都未出。

  被指騎呢的四子對帥有唔同睇法,193覺得姜濤平日怕怕醜醜,一上台好有自信,好charm;保錡覺得陳偉霆有自傲感覺,好適合做一個表演者,而他冇錢所以未帥:「喺呢個社會,有錢先有自信,好似肥仔係好靚仔,因為佢真係好有錢,可以救濟到身邊嘅人,我係其中一個。」


hd