《綠豆》入戲太深碰面就喊 林保怡周家怡再合作更痛苦

  林保怡和周家怡繼ViuTV劇集《瑪嘉烈與大衛系列— 綠豆》後,相隔4年再在《歎息橋》合作,而家怡對保怡今次身兼監製的表現亦讚不絕口。兩人坦承上次合作因入戲太深,之後每次碰面就喊晒,有段時間要避見對方抽離,而這次再合作默契依然,又形容角色關係更加痛苦,而且會令人好忟憎。

  保怡跟《瑪嘉烈與大衛系列— 綠豆》的兩位導演Fatball(李紹波)、25(楊承恩)合作後一見如故,決定成立製作公司繼續合作關係,《歎息橋》是成立後首部作品,他形容就好似睇住個Baby出世一樣,不是緊張而是開心。家怡踢爆保怡不想錯過每個參與機會,「嗰時係唔使戴口罩㗎!佢病到戴住口罩都要出嚟,佢個樣我以為佢唔得呀!」

  對於兩人再合作,保怡自爆原來上次合作完《瑪嘉烈與大衛系列— 綠豆》一直抽離唔到,「拍完之後,我好唔想見到周家怡,因為『大衛』未脫離林保怡個身,覺得『瑪嘉烈』負咗佢感情,維持咗年幾兩年,啲朋友有聚會我都會避開見佢。(周:嗰時我哋見面就喊)一播主題曲《我們的》就喊,係好入個角色。」至於今次《歎息橋》關係,保怡雖然覺得較易抽離,但一樣唔多開心,「呢個更加痛更加忟呀!上次《綠豆》係分開咗,今次維持咗10幾年,始終冇開始到。」能夠再跟團隊合作,家怡笑言有種付託終生的感覺,「拍完《綠豆》後大家好有默契同信任(林:可以結婚?)係,大家好了解。(下半生交畀佢哋)係,大家拍起嚟每分每秒好投入好Enjoy。」

  保怡透露未來會減產專心搞好公司製作,而新公司會有新思維,《歎息橋》亦用上新敍事手法,「簡單嚟講,《綠豆》順住12345咁,但係《歎息橋》係614398咁,好似好零碎,想觀眾幫我哋砌番啱,同埋可能用3個角色角度拍一場戲,到底邊個啱呢?所以相反唔係觀眾對我哋有要求,係我哋對觀眾有要求。」


hd