揀男友唔搵圈中人 衛詩雅嫌太易起清對象底

  衛詩雅最近主演愛情小品電影《熟女愛漫遊》,由於全片在日本取景,令詩雅拍得特別開心,更首度跟日本演員演對手戲,對唔識日文的她有一定難度。她演的女主角雖然跟拍拖多年的男友分手,但對愛情依然充滿憧憬,但詩雅坦承自己比較實際,揀男友一定要叻過自己,仲話唔搵圈中人嫌容易起清對象個底,好難仰慕對方。採訪:杜淑霞 髮型:[email protected] salondelotus

化妝:Kayte Fung 服裝:MAX&Co. 場地:The Stadium

  由於電影走夢幻浪漫風格,造型已令詩雅相當興奮,「開拍之前試造型,導演話可能要試兩日,我心諗有咩可能要試咁耐?點知上到去以為自己去咗Boutique,因為佢哋差唔多準備咗成50套衫,而且好多都係走可愛路線,好Cute好少女又Colourful。」

  在日本逗留一個月拍攝,令詩雅拍得份外開心,「每日都食好嘢,就算普通一個飯盒都超好味,搞到我肥咗,最慘我肥趁親係肥塊面先,差啲返嚟香港連唔到另一套戲。」講到第一次同日本演員合作,雖然言語不通,但詩雅睇到他們好專業,不過演對手戲時就有一定難度,「我要背埋對手日文對白,咁樣佢哋講到邊度,我先識得做適當反應。」

  講到詩雅演的「陶莎莎」好單純,對愛情有好多憧憬,她就坦言自己對愛情比較實際,「我要搵個叻過自己嘅人,只要佢喺某方面叻過我就得,當然嗰樣嘢我唔識,咁我就會更加仰慕佢,所以我唔會搵圈內人拍拖,因為我好容易起晒對方個底,唔會咁容易仰慕對方。」去年11月本報拍得她跟楊秀惠及沈卓盈的前男友麥偉汶(Ray)甜蜜行超巿,問到男方是否令她仰慕的新歡,她就拒絕回應話遲點才正式交代。


hd