一家三口去踩車 林子聰雙眼冇離開過囝囝

  六師弟林子聰近年主力喺內地發展,拍過好多劇同網絡電影,好似《新河東獅吼》、《河妖》及《孫悟空大戰盤絲洞》等,睇個名都知好睇。因為疫情影響,肥仔聰之前留咗好耐時間喺香港,咁就啱嘞,阿囝林奕滔(Chester)得4歲,日日陪仔玩,時間超易過。之前就見到佢哋一家三口去咗數碼港踩單車,肥仔聰眼中只有囝囝,一路望住一路踩,踩咗兩個幾鐘就返歸。 採訪︰譚壹致

  數碼港公園可以話係星級公園,梁詠琪、吳千語、JW等都好鍾意喺度玩呀放狗呀,想撞星得閒入去兜個圈啦。講返肥仔聰,當日下晝3點半,佢同老婆、囝囝及一個男友人現身數碼港,主力係肥仔聰同囝囝玩,老婆就負責睇住啲嘢。



  應該平時掛住搵食,親子時間唔太多,所以肥仔聰一到埗就除低口罩黐住個仔玩,兩個人沿住公園踩單車,正確嚟講係老竇跟住囝囝踩,踩咗一陣又唞吓再繼續踩,之後兩個放低單車喺草地上玩推嚟推去,有幾好玩?唔知,總之佢哋玩咗好耐,踩完又推完,一家三口加朋友就離開,肥仔聰逐架單車放去車尾,擺好晒就揸車返歸,又要玩又要揸車,認真辛苦晒。


hd