34吋半D Cup上圍加44吋長腿 劉穎鏇扮護士姣o氹副導演

        TVB姐仔人才短缺,所以擁有34吋半加D Cup上圍及靚樣的劉穎鏇(Tiffany)被力捧,角色愈嚟愈有發揮。日前於新劇《超能使者》中上演一場制服誘惑姣o氹副導演嘅戲,身穿超短護士制服的劉穎鏇,輕鬆晒44吋半滑淨長腿,加上34.5D、25吋半、35吋半浮凸身形,佢咩都唔做齋企喺度,殺傷力已非常厲害。

當日劉穎鏇飾演臨時演員,要着超短護士制服扮俏護士,眼見有位做臨記嘅老人家倒瀉咗個飯盒冇飯食,所以拔刀相助,𠌥身加嗲聲加親手抹汗,務求色誘副導攞多個飯盒,被同是臨記的陳山聰見到,誤會她不守婦道,不忿哥哥林子善對她大獻殷勤,兩人互罵。

山聰讚又高又Fit

  因為劇情需要,Tiffany要上晒電姣爆副導,監製文偉鴻嫌Tiffany太過保守唔夠Open,要求她落多幾錢肉緊,Tiffany好聽話即時嘟起個嘴,又翹腳坐晒長腿,更不時搖動大髀,姣功上升100級。身高5呎9吋半的Tiffany着住剛剛冚住Pat Pat的超短裙,腳踏5吋火紅色高踭鞋,行路時裙尾左搖右擺,𠌥身時裙尾又蹺起,打底褲若隱若現,連就快做老竇的山聰都讚不絕口:「邊個唔對佢流口水㗎?佢係啲少男心目中嘅女神,佢又高又fit,啲戲又愈嚟愈好,不過,我做爸爸喇,我點會畀佢電親呀?」之後山聰更補充,「佢呢啲年紀唔啱我,我對住老婆一心一意,遲啲就對個仔全心全意。」

有胸有腳但賣性格

  Tiffany覺得造型有啲爆:「條護士裙真係有啲短嘅,但都ok啦,佢哋幫手睇住我,肯定冇走光。平時我梗係唔會着咁短嘅裙,唔想就住就住,着短褲仔咪唔使擔心囉!」被指係「長腿女神」,她大笑說:「我唔係女神,啲人有話過我長腿,但冇聽過讚靚,我都想條長腿做到賣點可以拍吓廣告呀!但賣健康,唔係賣性感,如果要我着三點式拍廣告,就要睇吓係咪有需要。以前參加港姐時都畀人讚過樣靚身材正,但真係唔想用身材做賣點,自己唔想咁性感,亦唔鍾意show咁多,所以都會保守啲,可以嘅話,想人哋認識我性格多啲。」

爽朗性格唔收兵

  Tiffany又自爆現實生活中冇試過收兵:「我好男仔頭,同男仔好friend,但唔係嗲嗰啲。」山聰就大讚Tiffany爽朗性格好正:「佢得23歲咋,真心佢邊有咁多呢啲經驗呀!幾時玩到結婚呀?而且佢唔係呢啲性格女仔,有啲矜持好啲,佢係好女仔嚟,所以我哋要好好咁保護啲小花,等佢好好咁喺TVB茁壯成長。佢已經上緊位,絕對有條件做一線姐仔,仲會好快㖭呀!今次唯一提佢咬字,因為佢係鬼妹仔,有好多四字成語唔多明白。」

採訪:方騫平

攝影:李維隆


hd