仔大女大各自玩 王敏德好彩有老婆陪放狗

  王敏德(Michael)有份拍嘅TVB劇《飛虎之雷霆極戰》就快播完,唔使忙宣傳又未有工開,所以Michael呢期都好得閒,但仔大女大有工作有拖拍大把嘢玩,唔會成日陪住佢,好彩仲有老婆。日前下晝,王氏夫婦去咗數碼港公園放狗,男嘅負責湊狗,女嘅負責睇住啲嘢,玩咗個幾鐘就返歸。採訪:譚壹致



  55歲王敏德有兩女一子,兩個女見報率都好高,日前二女王麗嘉(Irisa)出席活動,提到疫情下反而瘦咗,仲連上圍都縮咗水,她說:「連媽媽(馬詩慧)都咁講,但我覺得仲可以細少少,一向都覺得太大。」咁嘅話題見報率點會唔高吖。之後Irisa透露聽日父親節會陪爸爸打Golf又會同姐弟夾錢送打Golf嘅專用手錶做父親節禮物。

  當日下晝三點,王氏夫婦帶住Irisa隻法國鬥牛犬Johnston揸車去到數碼港公園,到達不久就遇到朋友,三人一狗係公園Hea咗個幾鐘。王敏德主力陪隻狗跑、追住隻狗、拋波畀狗同埋幫隻狗影相,放電量極高,相信隻狗當晚應該好好瞓,王敏德應該都一樣。而王太就舒服啲,因為佢負責坐低睇住啲袋、餵狗狗食零食同埋睇老公影狗狗後嘅作品,出汗量唔高,可以除低口罩呼吸新鮮空氣,兩公婆都好滿足,留咗個幾鐘就返屋企。


hd