Think Big女神與AV女優經理人合作 邱晴唔賣34吋半胸賣得意

        2017年,當年17歲的邱晴(Mandy)參選港姐,雖然5強止步,但落選後即簽約無線擔任兒童節目《Think Big天地》。憑着甜美笑容、5呎7吋半身高、34吋半上圍及42吋長腿,Mandy獲網民力推做兒童節目女神,雖然有大好上位機會但她卻於上月初離巢外闖,更打算搞網上兒童節目,她說:「始終電視台多限制,我比較搞鬼,又唔想困喺一個地方。」她正秘密練兵,隨時殺入樂壇,20歲的她大把世界。

在效力無線的3年間,曾在台慶中頭獎獲得52萬獎金的邱晴除了固定主持《Think Big天地》外,也參演過綜藝節目《美女廚房》及劇集《愛.回家之開心速遞》、《白色強人》等,演出機會尚算不少,但她仍選擇離巢並跟日本AV女優浜崎真緒的經理人合作,令不少男Fans非常期待及疑惑,究竟Mandy之後會唔會有性感演出?提到性感,Manday即落閘:「合作啫,唔係簽約,加上每個人都有唔同嘅路線,佢哋行美麗,我就行番得意。」以美麗形容日本AV女優的確幾搞鬼。她之後再強調自己比較保守,只想行斯文路線。問到是否媽咪唔畀?「佢想我清純啲,但都好Free冇限制,只要做嘅嘢對得住良心。」

讚好馬明

  講到以往多演清純少女,年僅20歲的Mandy亦自問演繹唔到妖艷角色,早前客串新劇《BB大晒》時要挑逗馬國明(馬明)更緊張到拍攝前搵妹妹綵排,「本來要摸馬明大髀,但我完全唔識勾引人,所以係勁難嘅挑戰,如果要演呢啲角色,我會好驚、好擔心。」問到拍攝時馬明有無Feel到佢好驚?一提馬明,Mandy即讚:「佢好有風度,問佢咩都會答,又會叫我放鬆啲,佢好似爸爸,好Man,同佢合作好安心。」Mandy又唔覺意自爆曾聽過湯洛雯讚馬明,「佢讚馬明好單純好善良。」

進修藝術

  至於離巢原因,Mandy直言TVB較多限制,自己希望作多方面嘗試,「太多嘢想做,暫時唔想畀佢綁住先,而家就籌備緊搞網上平台節目,會邀請小朋友同佢哋互動。」並指目前努力學唱歌中,已獲唱片公司招手的她不排除將來向樂壇發展;此外,中學畢業的Mandy又考慮到台灣報讀藝術,她說:「記得有次同小朋友玩問答遊戲,佢哋好醒可以秒答問題,自己就一題都答唔到,令我悶悶不樂,覺得唔夠小朋友叻,係時候要進修一吓。」

撰文:黎寶倫 攝影:譚壹致

場地:FlamesGrilledChicken

鳴謝:Barry@巧鬆啲

hd