請嘉賓《自煮》大開眼界 彭秀慧笑周秀娜亂食嘢好離譜

  導演彭秀慧最近為香港開電視飲食節目《自煮女人最漂亮》擔任主持,並邀得「廚房新手」周秀娜、鄭欣宜、周家怡、張紋嘉(Crystal)等一同煮食及分享養生心得。彭秀慧坦言集集煮到一額汗,對眾美女嘉賓自稱唔識保養亦相當疑惑,她笑道:「好似細個考試,個個都話自己冇溫書但出嚟100分,我唔信囉。」採訪:黎寶倫

服裝:YLY studio、場地:THE WAVE

  自認停留在睇食譜學煮餸的彭秀慧,節目中要同時烹飪及訪談,加上嘉賓又唔識煮,直言非常困難;而當中最「得人驚」是張紋嘉,她笑指對方好似「未見過廚房」,問啲問題好好笑,帶給觀眾好多歡樂,彭秀慧說:「以我哋嘅資質都煮到出嚟、見得吓人或幾好食,咁你都會煮到。」談到「29+1」才開始保養,她最近愛上飲豆漿,每朝也會飲蜜糖水及用椰子油漱口,問到有否從嘉賓們身上偷師?彭秀慧笑言:「啲嘉賓離晒譜,個個都話唔識打理自己,周秀娜話自己亂咁食嘢又唔戒口,我唔信囉。反而廖子妤、余香凝未到30歲已經好擔心,又話暖宮、胃寒、手腳冰冷。」

女人識求生好重要

  至於「自主」女人是否最漂亮,彭秀慧認為女性至少要有求生能力,有否伴侶都不影響獨立生活,人生應自己作主。提到嘉賓大多是單身,笑問可覺得女生太Tough冇人追?她說:「有人話我做咗導演更加唔使諗有人Approach,但我覺得好冤枉,工作還工作,背後都可以有另一面。」私下跟嘉賓好Close的她未覺單身女星感憂心,「佢哋都喜歡工作,個個都隨遇而安,反而最年輕嘅廖子妤、余香凝最徬徨,尤其余香凝想30歲前結婚。」


hd