古天樂馬浚偉出錢出力 林子博拍真人騷為癌妻而戰

  患有「平滑肌肉瘤(腹腔)」嘅林子博太太董燕君(Shirley),最近因為腫瘤痛,食完含有嗎啡成份嘅強力止痛藥後又暈又嘔,辛苦到落唔到牀,要入院接受治療同埋重新調校藥物份量。目前Shirley已回家休息,老公林子博可以專心拍攝綜藝真人show《大叔要變身》,希望操fit body為癌妻而戰。採訪:方騫平 場地:productionFL

  林子博嘅外判綜藝真人show《大叔要變身》共10集,將於年尾喺香港開電視77台播出,除咗記錄子博大變身及瘦身過程,仲會邀請嘉賓朋友跟他對談:「因為瘦身只係講外表,變身係由內到外,心態同生活上嘅改變,俾人睇到重新出發。以前我得140磅,好瘦吓,係老婆口中嘅靚仔,自從有家室後就開始放肆,最高紀錄有165磅,肥到一個波咁,因為我食得好誇張,可以隊成罐薯片加埋雪糕,最愛梅菜扣肉、海南雞連雞皮食。」

努力減磅為家人

  因為飲食唔節制,49歲嘅子博經已出現「三高」,身體響起警號:「o依家我嘅健康係屬於屋企人,因為靠我一個人搵食嘛,同埋做幕前又唔可以太離譜,o依家跑步、做健身加埋節食,暫時減咗5磅。」原來節目係Shirley打畀相熟導演傾返嚟:「去年10月離開TVB,到今年4月未開過工,太太有病焗住停工,唔擔心就奇,不過,我都成日叫佢唔好擔心,冇嘢緊要得過健康。雖然經濟只係『掹掹緊』,但我有電單車牌,送外賣仲得。」

  他又大讚古天樂及馬浚偉有情有義:「今次太太入院,古生Keep住有打嚟慰問,問『有乜可以幫到手?』佢好好,好有心,仲介紹佢個主診醫生畀我哋,叫我唔使擔心(診金),睇咗先。其實關心同問候幫到我減輕唔少壓力。除此之外,馬浚偉承諾,無論開電影、舞台劇都預埋我。」


hd