返港密密開工好開心 喬寶寶開到口恨拍ViuTV劇集

  喬寶寶難頂戲癮,月前由蘇格蘭返港拍電影《時代》,緊接拍另一部中印獨立電影《我男友係好差》,之後還會接拍一套鬼片。雖然喺疫情下減薪兩成,但密食當三番,寶寶都好開心,佢仲有個願望就係拍到ViuTV劇集,甚至做吓佢最拿手嘅綜藝、旅遊節目,ViuTV高層睇到呢篇報道就考慮吓啦!採訪:方騫平



  返港期間日日有工開,喬寶寶心情大靚,不過,採訪當日寶寶要調整心情,以一個沉重mood拍一場頹廢囝囝(南亞裔演員成家宏)炒車受傷入院嘅戲,由於傷及囝囝女友(陳欣妍飾),未來親家楊卓娜去求喬寶寶拆散鴛鴦,飾演成家宏好友嘅岑珈其就加以安慰。

  獨立電影講述一個中國籍少女同印度男孩喺香港發生嘅愛情故事,並帶出香港及印度獨有文化。因為故事背景發生係南印度家庭,當地習俗要用手去食飯,有場戲要徒手食咖哩飯,寶寶食到手指甲邊都變咗黃色。問到喺疫情下要用手食飯會否唔太衞生?寶寶即解釋:「我哋有洗手,而且鏡頭有遷就,雖然我都有少少唔習慣,不過戲中老婆同新抱就食得津津有味。」

  另外,剛求婚成功嘅岑珈其由屯門撲去新蒲崗,只係拍咗幾個Shot就收工,他表示疫情下最緊要有工開,搵得幾多老婆本就搵幾多。而楊卓娜知道姨甥女「小珍珠」出現厭奶期,她叮囑楊怡唔使過度緊張,可能吹冷氣太多引致腸胃不適,建議阿怡用熟雞蛋加銀戒指幫BB碌吓頭、頸、肚,有助小朋友血氣運行。


hd