拒搵「快錢」唔恨入豪門 33E張沛樂靠自己賺錢買樓

        歷代性感女神邱淑貞、葉玉卿及林熙蕾等統統做晒少奶奶,不過個個都嫁入豪門,唔通個個都想嫁入豪門咩!現年28歲的E Cup「沙律」張沛樂於16年憑ViuTV選美真人騷《美選D.n.A.》彈出,入行6年來,無論拍戲、廣告或綜藝節目,擁33E、23、34.5激凸身材的她都性感上陣,無奈惹來淫媒問價,沙律激動回覆:「我唔會做呢啲嘢囉,黐線!」回復單身的她強調「講Feel唔講金」,就算有錢仔追求,沙律表示唔夾一樣No way,更盼努力工作靠自己儲錢置業!







張沛樂早前參與ViuTV新劇《熟女強人》拍攝,首演同性戀者的她與傅穎(Theresa)大談「SheShe戀」,惜今次激情戲留待 Theresa和吳千語發揮,至今只拍過吻戲的沙律也自言想試,希望熒幕「第一次」獻給男演員,那麼可有想合作的男神?她怕醜笑謂:「都冇乜⋯⋯我淨係鍾意鄭元暢,我好少覺得啲男仔好正,但細個睇《惡作劇之吻》第一次有情緒,之後一直都有留意佢。(有機會合作即𦧲飯應?)哈哈,有先算啦。」

引狼抽水問價

  擁33E火辣身材的沙律,前年才爆出被男藝人借故抽水,問有否陰影?擔心案件重演?當時忍氣吞聲的她說:「冇,基本上大部份人都好專業,唔會做呢啲嘢。其實遇到唔好嘅事都主張Say no、話畀人聽,但你出聲又會畀人話博上位,不過我都睇化,而家專注做好工作,人哋做錯嘢亦唔會縱容!(再遇到點避?)大家溝通好先,有事就搵啲嘢轉移視線走囉。」行得性感難免遭人「問價」,曾被撩陪老細一夜情的沙律又笑言:「我心諗傻嘅,自己搵錢唔好?點解要稀罕呢啲嘢呀!我覺得女仔要有矜持同搵錢能力,我就唔愁搵錢囉,深信自己做乜都得,有手有腳又識講嘢,冇理由做嗰啲。」

搵錢唔靠男人

  去年尾宣佈跟拍拖3年多的林耀聲分手,回復單身的沙律亦不乏追求者,但她說:「師傅話我適宜晚婚,同埋原來自己都幾挑剔,我覺得Feel愈嚟愈難搵,其實基本條件就得,最緊要兩個人相處夾唔夾、價值觀相近。(做藝人難搵對象?)係個人問題啫,現階段都好難有心情了解一個人。」現時專注事業的她又計劃儲錢買磚頭,目標先於兩年內儲到100萬,記者笑指嫁入豪門便可加快願望成真,曾拒絕有錢仔追求的沙律稱:「 使乜啫,自己印印腳唔得咩!我從來冇諗嫁有錢人,好彩屋企都唔係好貧窮,算小康之家,所以錢唔係我人生目標,反而想努力工作證明自己。」

撰文:黎寶倫 攝影:張詠森 

hd