大方再談羅仲謙鄧麗欣 36歲傅穎放下執着︰希望大家都好

        因為新冠肺炎疫情,在內地工作5年的傅穎(Theresa)惟有回港搵機會,在剛播映的ViuTV新劇《熟女強人》中便跟吳千語發展She She戀。剛36歲的Theresa雖仍然單身工作又不多,但現階段生活模式最自在,鍾意做乜就做乜。Theresa坦言已放下執着,唔再介意重提舊愛羅仲謙及曾經的死敵前隊友鄧麗欣(Stephy)嘅恩怨情仇:「每個人生活都唔容易,我希望大家都好!」

在ViuTV新劇《熟女強人》中,傅穎會介入吳千語同柏天男的感情大搞三角戀,除咗會同男方親嘴,更會主動錫千語,角色感情既複雜又混亂,但好有挑戰性。自從同年紀少她3年的蒙古男友分手後,Theresa Dry足3年,但堅拒接受同性戀:「我比較需要倚靠廣闊胸膛,同女仔感覺好唔同。我唔抗拒拍拖,命運安排,遇到就會遇到。」

冇俾虐打舊戀情嚇窒

  回顧Theresa情路,當年她曾大爆被舊愛羅仲謙虐打,兩人為愛反目,不過,Theresa強調冇俾以前嘅事嚇親:「其實以前嘅經歷令到自己成長,對待一段新戀情時更加知道點樣去維繫及同對方相處。細個拍拖唔係好了解一個人就同咗佢一齊,o依家認識朋友,會擺多啲時間去觀察、相處同了解,大家性格都唔一樣,需要包容。」

有留意舊愛結婚生女

  問傅穎可有留意羅仲謙同楊怡結婚生女新聞?她說:「其實香港真係唔大嘅,睇到新聞但冇乜特別感覺,本身都有咁多嘢要做,點會係咁留意人哋做緊乜嘢呢?擺返個專注力喺自己要做嘅事情上面,我希望大家都好,唔會想邊個唔好,講真每個人生活都唔容易,點解諗人哋唔好呢?最緊要自己都要過得好囉。」講到過去經歷,Theresa表示唔重要,唔會成日諗住同提住,「其實人生,每個人都有前任㗎啦!我成日覺得向前看啦,以前嘅嘢真係唔需要回望。」

主動去攬鄧麗欣破冰

  Theresa主動同傳足12年不和的鄧麗欣「世紀破冰」:「去年鄭秀文演唱會後台我哋碰面,我主動上前攬佢同佢打招呼,因為好耐冇見,就係咁樣我哋就交換聯絡,亦有聯繫返,仲話之後睇吓有咩合作,但合作要睇機緣囉!不過,諗返轉頭可能我太熱情,佢見我反應咁大都呆一呆。」Cookies解散後,她曾發表過千字文,公開當年被隊友排斥慘況,對此,她竟失憶說:「算啦,都過咗去。唯一係以前好少事都會好執着,會發表長文抒發,所以嗰段時間有好多著作出嚟,o依家叫我寫反而覺得好難。」問到近年生活?Theresa說:「其實我好幸福,就算一個人喺北京,有瓦遮頭,唔使喺出面日曬雨淋,有張咁舒服嘅牀可以瞓,身體又健全,其實有乜嘢會唔開心呢?個人諗得簡單啲,就會開心啲,同人嘈交好浪費時間同精神。」

採訪:方騫平 攝影:李維隆

髮型:Zap [email protected] 場地:THE STADIUM


hd