「隱世廚神」中秋煮十道菜 黎耀祥教你做節煮海鮮

  「視帝」黎耀祥原來係「隱世廚神」,每年嘅開年飯都由他主理,喺剛過去嘅中秋節,受限聚令影響只好留家同家人飯聚,黎耀祥由買餸到落廚,一腳踢煮十人飯,人人激讚好味道。祥仔分享大時大節買餸心得:「只要動動腦筋,就算係煮海鮮都可以提前一日買定食材,咁就唔使同人迫,又可以買平啲。」採訪:方騫平 攝影:譚壹致

場地:培仔海鮮@奶路臣街、阿一海景飯店



  喺中秋節前一日,黎耀祥同太太Julia帶埋《頭條日報》記者直擊他選購海鮮情況,兩公婆相當有默契,黎太負責睇車,由「老細」黎耀祥自備冰袋出擊,由於祥仔係熟客,老闆好識做咁按他需要執啲正嘢,好似鮑魚、大花蟹、花螺、皇帝斑及墨魚膠等,仲自動自覺打折,祥仔逗留唔使十分鐘就閃得。

  祥仔好權威咁發表下廚心得:「正日買餸,尤其海鮮一定貴好多,有啲嘢可以整定先,新鮮魚、蝦急凍一日冇問題,雪暈花蟹後,預早蒸好做凍蟹;花螺就用辣酒煮,做定仲入味。」正日當日早上11點,祥仔開始動手,仲加碼煲埋蓮子茨實淮山花膠竹絲雞靚湯、蒸雞、韓式炆牛仔骨、冬菇花膠煲、清酒牛油炒鮑魚等共十道菜。問祥仔可有興趣做烹飪節目?祥仔拒絕:「又唔得!我呢啲只係煮家常便飯,唔通炒碟菜都教人咩!之前請過鄭嘉穎夫婦嚟食飯,嘉穎鍾意食香口嘢,我整咗阿媽教落嘅葱蝦煎蛋角、蒸條魚,佢就食咗三碗飯,我諗只係啲餸好餸飯啫。」

  對於在《雙祥見》節目中爆過多年前拍一套古裝劇時,有女藝人經常遲到,又冇悔意,搞到累街坊,事後有人推測嫌疑人物係周勵淇、廖碧兒、郭羨妮及張可頤,對此,祥仔笑說:「全部都唔係,佢哋好到不得了,而且我冇同張可頤拍過古裝劇。」


hd