娛圈B Cup「串星」有樣有學歷 邱芷微 李敏嘉硬攻娛樂圈

        33歲「賈名媛」邱芷微(Chelffy)及27歲李敏嘉(Annabelle)喺即將上映嘅新片《時代》中結緣,客串演見習醫生。兩人有樣有學歷,因為熱愛演戲唔介意做「串星」、甚至特約演員。問到點突圍?邱芷微笑說:「我同人嗌交嗌得夠大聲!」李敏嘉就話自己夠勤力同埋有自信心:「其實我個樣都唔差啫,只係輸喺冇乜幽默感,成日搞爛Gag!」





邱芷微喺處境劇《愛.回家之開心速遞》中演「賈名媛」,同「大小姐」林淑敏係死敵,搞完「細龍太」陳偉琪,又挑戰「龔水戀」(呂慧儀同張景淳),真係好抵打,但她堅持:「觀眾睇得開心,我咪嗌得落力啲囉!因為網民鬧爆,有反應我先有得留低咋,好彩『大小姐』係個好對手,佢鬧起上嚟好起勁,否則平衡唔到!佢會教我點做戲,喺佢身上我學到好多嘢,其實佢一啲都唔惡。」

邱芷微唔歧視拜金女

  戲內嘅「賈名媛」貪慕虛榮愛釣金龜,戲外的邱芷微因為要尊重男友陳志忠(第一屆《功夫新星》),言行檢點係真淑女:「我身邊有好多呢類貪慕虛榮嘅女友人,劇中拋眉弄眼、搔首弄姿係學佢哋,我唔係發姣嗰啲,而且唔好名牌,不過,有前輩話做藝人要有名牌包包傍身,原來係咁,我長知識喇!」對於身邊的發姣女友人,Chelffy坦言唔會睇唔起佢哋,「各有各做,唔會影響到我,要學壞,喺英國讀大學時就變壞啦!坦白講,冇人約過我去船P都唔信啦,但我冇去過,要打理公司(同男友合辦武術學校)好忙,男友又唔鍾意,要尊重另一半嘛。」

李敏嘉讚好發哥華仔

  貌似「楊怡」的李敏嘉參加過2018年(該屆冠軍為陳曉華)港姐,最後因為面試時大搞爛Gag,畀現任邵氏電影執行董事及總經理樂易玲踢走,最後把心一橫去咗北京中央戲劇學院進修:「都羨慕陳曉華,其實自己個樣都唔錯啫。」喺浸大珠寶系畢業嘅李敏嘉好愛演戲:「可以演到平日做唔到嘅嘢,我好想嘗試做吓啲有氣勢角色,好似黑社會咁,我唔出聲,尤其眼神可以呃到人。」講到最開心的拍攝經歷,Annabelle即答是拍《毒戰》跟童年偶像黃宗澤合作,「場口係佢攬住我去激佢條女吳千語,嘩!佢攬住我膊頭喎,真係驚到心跳加速㗎!最記得首次拍戲,客串《賭城風雲》見過發哥(周潤發),佢真係好Nice,因為拍戲時唔可以影相,但佢趁冇人時主動過嚟問我『係咪想影相呀?快啲影啦!啲人喺度就唔影得㗎嘞!』跟住拎咗我部手機嚟自拍。」

  Annabelle亦同劉德華拍過一套未上映嘅新戲,從中體會何謂專業。「片中我只係一個小角色,係合唱團成員,喺街頭開粉絲聚會,嗰個場口佢經過條街,我差啲以為佢係導演之一,因為佢會留意所有細節位,就連路人甲點行都會教埋。」

採訪:方騫平

攝影:張詠森

泳裝:seayaa(李敏嘉)


hd