三瓣齊開殺出新血路 張顥霖望疫市人人有工開

  張顥霖(Henry)本來做開巿場推廣,開始跟藝人熟悉,近年開始搞埋演唱會等娛樂圈工作,但因為疫情好多工作被迫暫停,現在唯有向三條新出路發展,包括開網上娛樂平台「Bee Channel」製作非主流節目邀請藝人演出;其次搵藝人做主持幫商戶拍片宣傳店舖及生意;第三,搵藝人帶貨,希望在疫情下搵到商機之餘,製造更多就業機會,就算大家賺少啲,但望人人有工開殺出新血路。 撰文:杜淑霞 攝影:李維隆

  18年前Henry成立Hong Kong Marketing,第一個客戶就是黎明旗下A Music唱片宣傳工作,他坦承因而開始跟藝人熟絡,「之後係做多咗藝人嘅宣傳,13年仲開始做埋演唱會主辦,仲有好多娛樂圈生意衍生咗,因好多客戶想搵藝人參與宣傳,我哋都可以提供到呢啲服務。」

  不過社運加上疫情,去年8月開始公司零收入,Henry即時變陣開始發展三條新出路,「有個新平台『Bee Channel』,會開啲有別於主流平台嘅節目,會邀請一啲明星做主持,嚟緊會先開寵物節目。o依家網上大家都向呢個方向,搵啲巿場上大家鍾意睇嘅節目,譬如計劃搞個《一百蚊遊香港》,講一對情侶用一百蚊點樣拍拖使錢,另外,仲會開Live做音樂節目,總之會多元化發展。」

  另外,Henry又會安排藝人做主持幫商戶拍片宣傳店舖及生意,以及搵明星帶貨,希望在疫情下搵到更多商機之餘,製造更多就業機會,「o依家全民都直播同埋網購,我哋做啲直播賣貨,同啲明星同埋網紅合作,我哋咁多年都累積咗好多商家嘅關係,佢哋都要搵途徑做生意賣貨,呢個係個好方法。仲有就係諗咗個類似廣告套餐叫做『全港優質品牌巡禮』,三萬八幫客人拍一條3至5分鐘嘅短片,呢條短片有個藝人主持同佢傾偈,介紹商舖嘅嘢,推出唔夠一個月就有廿幾個客,算喺淡巿殺出咗條血路,雖然公司賺嘅錢唔多,但係藝人同製作團隊都有啲工可以開吓,又可以幫襯吓啲媒體,大家都好啦!」


hd