太太兩周前已簽同意書拒絕急救 林子博喊住提老婆心願︰「仔女長大要照顧爸爸」

  昨晨,去年確診罕見癌症「平滑肌肉瘤(腹腔)」的林子博太太董燕君(Shirley)不敵癌魔病逝,子博在社交平台寫下情深字句送別愛妻,一字一淚。早前子博為太太搞網上眾籌幹細胞治療醫藥費,可惜完成4針第一個療程後,對太太效用不大,離世前的肝、腎、肺腫瘤變大,影響排毒功能,出現腹水及水腫等症狀。子博上周接受《頭條日報》訪問時坦言老婆在兩周前已簽同意書拒絕急救(不能康復的僅維生治療)兼願意捐出眼角膜遺愛人間,子博相當無奈忍唔住流下男兒淚,講到太太心願,子博難過透露,「希望子女長大後要照顧爸爸。」

臨終前董燕君因為嚴重腹水及水腫再次入院抽水,仲要吊蛋白針補充營養,當時子博坦言相當擔心:「其實佢個肺、肝、腎一直都有事,但o依家嚴重咗,要聞氧氣同埋抽腹水,腹水頂住又痛唔想食嘢,佢一咳,全家好緊張佢,總動員去照顧佢,同佢摸背,畀佢聞氧氣」因為要貼身照顧,所以子博在家不能離開老婆三步以外範圍,亦理解到病人會特別嗲。

提老婆想放棄即喊

  當時子博坦言好奇怪,覺得太太好似覺得自己出唔到院。「上次佢入院,醫生指佢身體太脆弱,有乜事做心外壓會壓爆佢啲胸骨,所以經已填咗拒絕急救書同埋決定捐眼角膜。」子博哽咽地說,「仲諗住又唔好咁快咁消極,我哋仲有好多方法未試,好似中醫!當然我好欣賞佢呢份遺愛人間嘅情操。太太話,佢身上太多腫瘤,好多器官捐唔到,唯一可以捐到眼角膜,既然有咁多人幫過佢,佢都好想唔喺度時幫返有需要嘅人……我唔係好想聽到同唔係好想面對,因為好難面對……」語畢,一直強忍淚水的子博即拎紙巾抹眼淚。

娛圈朋友送禮問候

  待情緒稍為平伏,子博再說:「我有同仔女講過,無論太太喺唔喺度都好,我都要維持個家。其實太太知我係有主見嘅人,好放心交頭家畀我,太太亦有同仔女講,叫佢哋大個之後,就算結咗婚都要照顧爸爸。」當時子博提到未必再做第二個幹細胞療程,但都好多謝伸手幫他的每一個人:「小恩子搵朋友送嚟輪椅、拐杖、沖涼凳及氧氣機;古巨基、馬浚偉、何英偉等出錢支持,田蕊妮登門打氣,甚至有小朋友話捐出一百幾十零用錢,真係好感動,娛樂圈有情,人間有愛。」

做節目向難度挑戰

  去年林子博老婆董燕君患重病,之後到他不獲TVB續約,子博要獨力撐起頭家,所以努力Keep Fit拍攝8集真人騷節目《大叔要變身》,記載屬於他的感人故事,太太仲會抱病出鏡為他打氣。

  首集節目已於10月11日晚在香港開電視77台播出,由於節目調動關係,第二集開始改於逢周六下午四點播出,子博首次孭起一個節目,對他意義重大:「因為太太擔心我冇工開,所以由佢搵導演速成件事。除咗會陸續請嘉賓,我仲會玩直立板,滑翔降傘向難度挑戰。」問到會否擔心玩到受傷?子博即以「該死唔使病」作回應,「要珍惜每一日,活得精彩,欣賞身邊人優點。」

採訪:方騫平 場地:eliment Fitlax

hd