放下老友錢國偉離世傷痛 鄭伊健 任賢齊有戲拍 片場好High

  疫情緩和,由范振鋒監製,鄭伊健、任賢齊(小齊)、潘燦良、談善言及張達明等主演,將安排賀歲檔上映嘅溫馨勵志電影《大Project》馬上趕工。等咗成年終於有工開,就連好友錢國偉剛逝世嘅鄭伊健都難得有笑容,開心同談善言對戲,而小齊就喺片場度表演企起身揸電單車,現場瀰漫一片歡愉。

電影故事來自新導演沈錫然的親身經歷,伊健、小齊飾演由細玩到大嘅好朋友,兩人合作開洗碗工場,聘請弱勢人士,但又從中瞞騙政府社會福利補助,最後當然改邪歸正,笑中有淚。伊健自三年前拍完《黃金兄弟》後已再冇開戲,他表示好掛住開工飯盒!小齊同相熟劇組並肩作戰就相當興奮,日前兩人拍洗碗工場景,小齊着住T-shirt短褲配白色水靴,同「南亞裔四大天王」駕駛電單車,跑住去送貨;伊健就同談善言拍表錯情嘅曖昧文戲。

放低故友傷感寄情工作

  老友錢國偉上月底不敵癌魔「走先」,伊健雖然心情低落,但當日伊健情緒平復番唔少,心情唔錯,主動跟導演及談善言對戲及排走位,笑晒口提供咗唔少意見,相當專業。伊健仲貼心地為本報構思獨家相位,跟小齊騎住電單車,同「南亞裔四大天王」演員嚟個有型合照,伊健禮讓地跟小齊說:「我坐架細,你坐部大喇!」小齊即話:「冇所謂!」伊健零架子,影完相後還禮貌對住大家說:「唔該晒咁多位手足!」跟住用烏都語(巴基斯坦話)跟「南亞裔四大天王」講:「shukriya(謝謝)。」有工開,有精神寄託,伊健成個人生猛晒。

自爆食店執笠慘痛經歷

  小齊超愛揸車,片中要他揸電單車送貨,小齊寓工作於娛樂,開車前興奮到扭身扭勢,乘機仲踩多兩個圈,臨尾加演企起身開車、坐喺度伸起雙腳揸車嚟自娛。片中小齊係洗碗工場老闆,加上有洗碗機,唔使落手落腳做洗碗,但自爆有日壞機要用手洗,仲要拍足一日,洗到雙手皺晒皮。對於做洗碗工,小齊一啲都唔陌生,自爆有個慘痛經歷:「大學時喺餐廳洗過碗,我鍾意食嘢,97年前開咗間泰國餐廳,生意好時都要幫手,由堂前、侍應、廚房做到洗碗碟工,好辛苦,做洗碗工好重複,單調啲,做到嘅人真係唔容易。」小齊話當年洗碗洗得好落力,「洗得唔乾淨會影響生意,嗰時未係好紅,當係副業,諗住有嘢做都幾開心呀,但後嚟紅咗冇時間打理,結果執笠。」

  小齊強調之後冇再開食肆,因為佢太好客,「所有朋友去食嘢都搵我,由我埋單所以賺唔到錢,每個月會計都打畀我話要補錢填數,經此一役,啟發到我做生意同交朋友要分開。o依家作為大岳娛樂老闆慶幸有錢賺,我會同藝人講明,投資一個演唱會未必即時賺到錢,但要做好口碑,將個人提升,藝術同經營生意要取到一個平衡,但我會先選擇藝術行先,要留畀人有刻骨銘心嘅作品。」

採訪:方騫平 攝影:李維隆

hd