25歲細John恨闖娛樂圈 姜大衛介紹孻仔畀陳嘉上識

  姜大衛(John哥)夫婦早前帶埋孻仔姜卓文(細John)同女兒去又一城行街,其間,充滿表演欲的細John更忽然身痕跳舞,另一日巧遇導演陳嘉上,John哥仲即刻介紹囝囝畀對方識,唔知係咪想趁機幫細John搭路入行呢?採訪:譚壹致

  現年73歲的姜大衛與太太李琳琳結婚46年,育有兩女一子,25歲孻仔姜卓文更盡得父母遺傳,生得高大又靚仔,十足韓星咁。因此兩年多前,John哥已爆囝囝獲兩間公司邀試鏡,至去年,一向對唱歌演戲感興趣的細John,就參加咗ViuTV選秀節目《全民造星II》,John哥仲公開力撐「想個仔贏」,惜最終未能殺入決賽,但細John並冇放棄,繼續於社交網分享自彈自唱Cover,近來還跟Tank(梁德忠)學跳舞,增值自己。

老竇做到嘢

  早前下午2時許,細John陪父母去又一城食完Pancake後,一家三口便笠番個口罩到銀行換錢,其間John哥企喺側邊傍實老婆辦事,一時又擔天望地,而開始習「舞」的細John等到悶悶哋,就忍唔住企喺窗邊「排舞」,之後又好Gentleman地繞住媽咪離開。另一日下午3人再次出動,並約埋家姐一同去運動舖買波鞋及健身用品,席間兩老各自在店內閒逛,雖然John哥頻頻繞埋雙手又插袋,好似好Cool,但路過一間餐廳巧遇陳嘉上,他即展露笑容並呼叫對方,隨即捉囝囝埋嚟跟Uncle打招呼,細John亦禮貌地向陳導鞠躬,見陳嘉上笑晒口,似乎都幾鍾意呢位世侄。


hd