閃嫁全因社運遇催淚煙被拖實 莊韻澄讚破產老公 有畀家用靠得住

        曾經因為前度張致恆多次偷食,Hurt到幾乎想跳樓嘅莊韻澄(Xenia,前名莊端兒),於上月12日閃嫁拍拖僅兩個月嘅經理人呂成忠(Joe),變身幸福人妻。對於老公被踢爆欠債纍纍兼破咗產,莊韻澄力撐老公靠得住:「佢叫我放心,承諾等佢處理好之後,會好好照顧我,我信佢會翻到身。」

莊韻澄改咗名後,真係好運齊來,Dry足四年終於搵到真愛,換上deep V噴血晚裝的莊韻澄接受《頭條日報》訪問時感受特別深:「喺工作上合作咗年幾,直至今年4月佢先對我表白,9月開始發展。」Xenia表示她一路拖,並用工作繁忙而推搪3次,「為咗想睇清楚呢個人,每次都話遲啲先啦,難得阿Joe每次都肯耐心等候。」

因為安全感而放心一齊

  觀察期間,莊韻澄會表露自己最差一面,如發脾氣,會好野蠻及唔化妝。但因為對方一次表現令Xenia好感動,即時心軟。「發生喺去年社運期間,佢真係好緊張我,覺得一個女仔喺出面做嘢會好危險,成日話『不如我嚟車你啦!就算喺條街有乜事,都係喺我架車啫,唔係你架車。』有次街頭真係遇上催淚彈,佢緊張到捉住我,好驚我會有乜意外,同平時認識嘅佢好唔同。」Xenia強調當時同唔係好熟,只係一齊做嘢,關係曖曖昧昧,「所以當時心諗『真係咁緊張咩?呢個男仔幾有責任感喎!至少有事時唔會掉低你走咗去先!』以前真係遇過呢類人,原來身邊有一個好驚你會受傷嘅人真係好有安全感,都想同呢個人拍拖囉,而且佢唔會口花花,個人好悶好內斂,咁就唔擔心會出軌。」

財政獨立拒幫老公還錢

  對於老公被爆破產,Xenia直認一早知。「合作時都知道佢破產,為乜破產就不便提,但我同老公財政獨立,佢還錢係佢嘅事,我係唔會幫佢還嘅,但佢嘅錢係我嘅錢,我嘅錢係我嘅錢,所以佢好慘㗎,啲錢全部落晒我袋,同埋佢喺呢個環境,每個月都有畀家用我,係個負責任嘅男人,到現時為止喺財政上我都未操心過。」至於前度張致恆老婆雯雯反擊莊韻澄數佢老公,不滿表示:「唔使提醒我老公係一個咩人!」莊韻澄笑言:「有啲嘢發生咗就發生咗,佢哋開心咪得囉,我諗佢哋相處咗咁耐,唔會唔知對方係咩人,當然佢好愛老公先至會咁講啦,畀着我都會咁做。」

採訪:方騫平

攝影:譚壹致

化妝、服裝、場地:Aplus make up & stylist


hd