電影安全煞科 豪請8圍慰勞宴 鄭伊健走出老友離世悲痛 笑晒任影

  2020年不少名人紅星相繼離世,一個多月前因胰臟癌病逝的金牌監製錢國偉(Wilson)於今晚假沙田寶福紀念館設靈,翌日舉殯,跟他識於微時的鄭伊健、錢嘉樂、林曉峰等將擔任治喪委員會成員。雖然好兄弟「先行一步」,但伊健與同樣痛失小師弟黃鴻升的任賢齊(小齊)都好專業地完成由范振鋒監製的新片《大Project》。日前電影在疫情下安全煞科,伊健和小齊便跟一眾台前幕後到尖沙咀食北京菜慶祝,據知全場筵開8圍,由伊健埋單,席間見他滿場飛,跟大家笑晒狂影大合照,相信心情已平復好多。

採訪:張詠森、譚壹致

  鄭伊健與錢國偉相識於TVB兒童節目《430穿梭機》,自始合作無間,2015年Wilson與陳宛蔚結婚,伊健更擔任兄弟團。直至Wilson患胰臟癌,有傳伊健出錢又出力,除仗義資助醫藥費還介紹名醫給好友,可惜Wilson於10月27日不敵癌魔病逝。上月初公開亮相時,伊健談起故友也表現豁達,自言會以樂觀態度面對,相隔多時,早前晚上約7點半,《頭條日報》記者就發現他與任賢齊、潘燦良等現身赫德道泰豐廔,原來當晚是電影《大Project》劇組食煞科飯,據知當晚由伊健自掏荷包請客,非常闊綽!

伊健係《造星III》粉絲

  當晚,出名冇架子的伊健大部分時間都掛住Social,他走勻幾圍枱跟眾人傾到哈哈大笑,個個仲爭住向他「集郵」,無論搭膊定Selfie,伊健都有求必應,o氹到後生仔和年長一輩都好開心。同場的《全民造星III》參賽者李浩軒和Buber(麥詠楠)也有跟伊健交流,前者更於IG貼出合照並搞笑留言:「同你哋拍戲好開心,無咩壓力,(伊健)搞笑幽默超級Nice~~不過我絕對唔會同花姐講你有追睇全民造星㗎。」至於小齊就與一班幕後傾到好開心,全程企住講多過坐喺度食,大夥兒玩到9點多陸續散去,小齊亦於10時許先行離開。而伊健則留守到最後約11點離開,落樓後途經一間酒吧,剛好遇着下半場繼續飲的工作人員,伊健吹多兩句水便Nice爆跟大家揮手道別,然後在司機及兩名友人陪同下乘七人車回家。

hd