唔介意同陳家樂拍激咀戲 連詩雅疫下入不敷支求工作

  連詩雅(Shiga)喺新劇《使徒行者3》中,以倒敍形式現身演袁偉豪(Ben)前女友,兩人除咗有激咀戲,仲有牀戲,由於Shiga同阿Ben唔熟,初時係有啲尷尬嘅,卻可以帶出新鮮嘅火花。問她同熟到爛,緋聞男友陳家樂拍咀嘴戲又如何?Shiga即尷尷尬尬說:「同邊個都好,睇吓有乜工作機會!」她坦言2020年入不敷支,係好需要每個工作機會。

採訪:方騫平 服裝:Vivienne Tam

  入行10年嘅Shiga近年轉投電視圈,之前喺《那些我愛過的人》飾演婦科醫生獲網民讚好,《使徒行者3》雖然戲份唔算多,但依然搶戲。講返難忘事,她說:「開工第一日就要拍場重頭戲,話我為咗查案色誘袁偉豪,要激咀。因為同對手唔熟,呢啲時候除咗溝通好重要外,惟有放膽去信任大家,盡情豁出去,所以只係拍咗1-2 take就順利收貨。」

  她大讚阿Ben係個非常專業演員,會講好每個細節位,「同阿Ben演戲要揣摩,相比我同周柏豪好似兄弟咁,大家最有默契,因為太熟,戲中情到濃時,好自然會錫番啖,面對人夫零顧忌。」問她可會接受跟緋聞男友陳家樂拍親熱戲?她即大耍太極說:「我同邊個都得,同任何人都可以演情侶……唔知呀!都未拍過,未發生嘅嘢預料唔到,睇吓工作啱唔啱,不過唔知點解冇人搵過我哋演情侶?可能啲人鍾意睇我同柏豪啩!我反而最想同陳豪演情侶,佢好有男人味,喺《殺手》入面好正,而且我都鍾意飲咖啡。」喺疫情下,Shiga坦言今年入不敷支,只能靠積蓄養媽咪,所以要節儉,兼且努力工作,同埋keep住正面心態,因為係全世界人一齊面對緊嘅困難。


hd