《造星III》決賽夜 祖祖一講Ben就喊 Alina KLAU落敗 另一半攬住呵番

《全民造星III》前晚(26日)舉行總決賽,最終由以跳「折骨舞」出神入化的Ben(趙祥誠)成功奪冠,陳葦璇得亞軍,季軍就是深得評判毛舜筠喜愛的ANSONBEAN(陳毅燊)。完騷後,邀Manson(張進翹)做嘉賓演出的Alina,有MIRROR成員男友Stanley(邱士縉)現身攬攬畀愛的鼓勵,他更向《頭條》自爆如何支持女友。而曾表示想同KiKi繼續發展的KLAU,獲女方勁讚表演有500分,搞到男方即變怕醜仔。至於俾A組參賽者暱稱為「媽媽」的客席導師梁祖堯(祖祖),講「阿仔」Ben奪冠,更感觸到秒速眼濕,仲自爆製作組有意邀他任《造星4》導師。採訪:杜淑霞、廖思慧

總成績得到第7名的Alina,對於兩個item演出,她坦承第一個表演較失準,「第一個item第一粒音就走咗,係畀自己一個好大挑戰,上唱歌堂唱到崩潰,唱到喊,呢隻歌好難,但係首歌好正一定要做到,今日算及格啦!」此時Stanley現身,《頭條》拉攏下終肯畀女友一個愛的抱抱,更大讚女方表現,「我覺得好好喎!好似好行,但係認真嘅,第一隻歌編排上面冇問題,因為有個好好嘅排舞師,跳舞上好誇張嗰啲係佢得分位,當然我最驚佢唱歌,佢唱都係有問題嘅,但係睇得出佢已經好努力,喺電視機同現場聽差好遠,我啱啱喺廠聽,都覺得OK!100分嚟講(Alina:有冇50?)70分啦!(Alina:多謝你呀!)我即刻send message畀佢話好好。」

  至於點樣支持女友,Stanley就自爆:「我其實呢幾日都係出任助手嘅角色嘅。」他在演出方面亦一直有畀女友意見,「譬如佢同Manson嗰隻舞,我都有份參與少少排舞,都一路有follow up成件事。其實贏輸唔緊要,嚟到呢度咁多人睇呢個節目,已經係贏咗,多咁多人認識Alina李靜蓮係邊個。」講到Alina向《頭條》預告有表演嘉賓時,以為是Stanley,他即搞笑話:「我驚我搶佢光芒!(Alina:唔得!我哋一定會鬧交㗎!)我o依家始終係巨星嚟!」

  總成績得到第6名的KLAU,就自言好滿意成績,「大家接收到我嘅energy,同埋金生(ViuTV高層金廣誠)都話見到我兩屆有唔同嘅表現,我覺得自己已經贏晒所有嘢。」而女友KiKi更加對KLAU演出讚不絕口,「身為之前嘅隊友,我哋又咁好朋友,我係好滿意!因為佢真係好努力,擺咗好多心機、時間、創作、排練,我好戥佢開心,我覺得佢表現超班。幾多分?畀佢500分!」KLAU邊講多謝邊怕醜到擰轉面,好鬼甜!跟住仲自爆,除了導師彭秀慧指導外,這次演出女友都有出力相助,「佢畀咗好多idea我,主要喺演技方面,應該點樣做,幫我補咗好多課。」

  祖祖爆花姐斟做導師

  做客席導師以來好肉緊的祖祖,提到「阿仔」Ben奪冠,他認為Ben是參賽者中進步最多,亦令他最為驚喜的一個,他邊講邊難掩興奮心情,秒速眼濕,「同你哋講啲真心話,我好滿意,因為阿Ben從來都係我心裏面嗰忽肉嚟,我又想喊!因為《想念》嗰part,你哋係唔會知道,我哋係用咗幾多個通宵教阿Ben行路,因為佢跳開舞,唔可以好感性同中性咁樣行,o依家行到呢一步,呢個仔攞埋冠軍,我覺得好驕傲,我作為佢朋友好驕傲,其實我哋都係屋企人嚟。我心裏面好想佢係冠軍,我知道佢唔係主流嘅人鍾意嘅嘢,但係喺觀眾投票,佢得到呢個賽果,我覺得香港觀眾已經進化,新世代來臨啦!所以我係好感動。」他又謂前一晚總綵排已覺不捨,「我o依家喺呢個位就最好,我又唔係導師,我係客席,我係『媽媽』啫,我係負責錫大家,愛大家啫!花姐有問我,下年想唔想做導師?當然想啦!但係如果要我同二汶做對手,我就唔想啦!我唔離婚呀!我唔要我哋個家散呀!哈哈!我想保住我頭家,唔知一齊得唔得?!彭秀慧都係好朋友,對佢我都唔想,我唔係咁鍾意比賽嘅節奏,但又好想好好培育佢哋。」

hd