同劉浩龍食麵被大嬸撩唱歌 陳奕迅心情靚爆任影唔嬲

        疫情致停工近1年的陳奕迅(Eason)去年自爆幾乎零收入,即使早排出新歌,他亦冇機會喺公開場合做宣傳,只能長期Stay home抗疫。昨日下午2點半,《頭條日報》記者撞到Eason同劉浩龍(師兄)喺大坑炳記茶檔食Lunch,二人甫坐低便迅速叫了麵及奶茶。食飽後,一向有「吹神」之稱的Eason,同師兄繼續坐喺大街密密斟,前者仲不時笑到瞇晒眼、拗晒腰,心情靚爆!逗留約半小時,準備離開的兩人被不少食客及途人認出兼索合照,雖然疫情嚴峻,但Eason都冇托手踭,即時戴番個口罩同粉絲「零距離」自拍。

  埋單後,Eason到附近買西餅再返回洗車屋取車,與職員相熟的他本來想畀錢,但卻遭對方婉拒,搞到Eason唔係幾好意思,一邊行上車一邊狂講多謝,忽然旁邊的綠衫大媽大叫:「唱首歌嚟聽吓啦!」Eason聞言即爆笑,當然最終一句都冇唱就閂門走人。採訪:張詠森




hd