陳漢娜歎去年收入得五位數 劉浩龍唔敢同鄭嘉欣拍咀戲

  劉浩龍(師兄)率領同門的陳漢娜(Hanna)和鄭嘉欣(Christine)向《頭條日報》讀者拜年,席間3人揮筆寫大字,祝大家身體健康、牛年好運到。講到新年願望是多拍戲,Christine即賣口乖想跟師兄合作,仲笑言唔介意獻熒幕初吻畀對方,但於幕前未咀過女仔的師兄卻大喊緊張!撰文:黎寶倫 攝影:梁志明場地:彩福皇宴 鳴謝:Barry工作室

  疫情衝擊各行各業,原定去年在內地開3場騷的劉浩龍,雖然因個唱取消而唔開心,但令他有機會跟Eric Kwok和谷德昭開拓新YouTube Channel,亦參與了ViuTV劇集《熟女強人》和網劇《把砒霜留給自己》等拍攝,新一年也希望繼續多演戲。問入行廿多年從未跟女星拍咀戲的他,可盼牛年來個零的突破?師兄打趣道:「今年唔好錫呀,大家盡量唔好有親密接觸。」私下Dry爆的他又稱享受單身生活,難道不恨覓女友?他說:「佢會出現就出現,同埋去邊度搵啫。(玩交友App?)唔會囉,唔通用真名Yo人咩,會俾人隊出嚟好危險。」

  憑《全民造星III》彈出的鄭嘉欣盼能出歌,說罷即向旁邊的師兄請教唱歌,對方贈言:「作品中帶多啲自己想法,最緊要Enjoy唱歌,做自己喜歡嘅嘢。」Christine又表示對演戲有興趣,亦想跟師兄合作,記者笑指二人可互獻熒幕初吻,師兄笑道:「多謝先,你幕前有錫過?」Christine笑言冇。師兄即說,「掂呀!打和!我諗會好緊張,平日睇戲好激昂。(Christine:我唔驚。)但我驚。」作為咀戲老手的Hanna即分享經驗之談,指事前需與對手溝通好。不過談到去年上半年幾乎零收入,幸後來有MV拍幫補吓,Hanna說:「有幾千蚊落袋已經好好。(成年收入得5位數?)應該係,真係捱唔到,要賣自己唔用嘅嘢。」至於牛年大計,她透露正洽談新劇及電影,並希望學番打鼓。


hd