囝囝怕老竇寂寞鼓勵搵女友 林子博一家三口食盆菜過年

  父兼母職嘅林子博過年前同一對仔女去酒樓食團年飯,15歲大女詠渝不忘賣口乖,狂講意頭說話同老竇拜年逗利是,子博乘機整蠱仔女,着他們講財色兼收,11歲細仔卓楠接受爹哋搵女朋友,因為唔想爹哋孤獨終老!對此子博笑言:「新年流流講呢啲!」真係童言無忌,笑爆嘴!採訪:方騫平 攝影:梁志明 場地:龍皇酒家@銅鑼灣世貿中心

  當天一家三口食團年飯笑聲不絕,子博表示除咗代媽咪派利是畀子女外,之前送聖誕禮物都會送得大份啲,要畀埋媽咪嗰份,又透露子女都習慣面對新生活。詠渝說:「我同細佬會互相照顧。」至於邊個做家務?子博話好公平,通常玩Card Game,由輸家去做,唔會恃住係爸爸點佢哋做嘢。



想返TVB做綜藝節目

  提到新年願望,詠渝最想疫情快啲完,子博希望所有人都身體健康,社會盡快回復正常:「o依家個個都嗌晒救命,所以最近出咗新歌《逆水行舟》嚟勉勵大家,即使逆水行舟爬得好辛苦,但都會有人喺身邊支持你,好似張衛健好撐我,之前仲用視像接受我主持嘅電台節目訪問。」至於卓楠接受爹哋搵新女友,子博沒好氣說:「都唔會係o依家啦,邊有咁快可以呀?」

  對於曾志偉做咗TVB高層,子博以前常訪問他,形容志偉係好好嘅前輩,他坦言:「有機會我都想返去,畢竟喺TVB做咗11年,而且帶住兩個細路仔,都想搵份穩定嘅工作,可以試吓拍劇同主持綜藝節目。」


hd