開刀解決逾十年宿患 方健儀唔再諱疾忌醫

  方健儀(Akina)由一位專業新聞主播變身KOL,健康形象的她喺疫情下有唔少收入,仲喺沙田中學母校附近屋苑做埋業主。方健儀自爆曾因為唔敢做手術,諱疾忌醫,即使患有「女人病」朱古力瘤,另外又患上痛到飛起嘅肛門瘻管超過十年都唔理,好彩得到正確資訊後,引刀一快,o依家冇後顧之憂。採訪:方騫平

  方健儀除咗做港台節目《精靈一點》外,周一至五晚上9時跟李雨陽、李麗珊(Lisa)主持香港開電視健康節目《Fit開有條路》,方健儀箇中亦有得着,尤其疫情下大家更加要注意健康,所以愈做愈起勁。她更分享年輕時諱疾忌醫嘅痛苦經歷,「20幾歲時因為肛瘻睇普通科醫生,醫生話術後處理得唔好嘅話有機會失禁,咁就嚇到我唔敢做手術,寧願痛爆同埋流出分泌物,直至年前接觸到專科醫生謎底先解開,原來呢個只係小手術,20幾分鐘就搞掂,真係後悔醫得太遲。」

  對於拍檔李麗珊初為人母,Akina就無意生B,「我年紀唔細啦!o依家好享受兩公婆自由自在,可以忽發奇想,元旦日凌晨四點起身上山睇日出,而且膝下無兒更加有時間照顧到雙親。」目前她努力賺錢,陳志雲更欽點她成為生髮代言人,「我呢啲『小薯仔』,喺TVB時未同佢合作過,只係同TVB高層交流飯局見過,有次喺電視城電梯入面相遇,意想唔到10幾年後,佢會引薦同我合作。」


hd