做童星曾被同學欺凌 陳穎妮唔怕醜以張曼玉為目標

  周柏豪師妹陳穎妮(Winnie)由模界轉型KOL,同師姐黎紀君拍片吹水、演吓小劇場,以為Winnie新入行原來她7歲已為《亞洲電視兒童台》擔任小主持,長大後又拍過電影和劇集,她表示對演戲感興趣,並以影后張曼玉為目標,最想跟劉青雲合演浪漫喜劇。撰文:黎寶倫 

攝影:譚壹致 場地:Sugar Please Studio



  擔任小主持的4年間,陳穎妮冇因此成為學校風頭躉,反而失去課餘跟同學仔玩的時間,令她慘成校園「邊緣人」並遭欺凌,「嗰時逢周六、日拍嘢,冇乜跟同學相處,所以好多同學都唔鍾意我,佢哋會話我:『係咪覺得自己好靚?』最嚴重一次係喺學校門口寫我名同粗口,好似欠債咁,有段時間唔開心到唔想返學,又冇朋友,覺得人生好灰。」不過長大後,她覺得一切都是成長經歷,做小主持也令她獲益不淺。

想同劉青雲演情侶

  離開亞視後,Winnie曾夥梁家輝拍電影《絕種鐵金剛》,後於無線劇《足秤老婆八両夫》扮演年輕版郭藹明等,早前就加盟種星堂娛樂公司。Winnie坦言最想跟劉青雲合作,「青雲個樣好正經,但有喜劇細胞,我本身好鍾意佢, 希望喺戲中同佢搞笑完再一齊。」盼有機會拍喜劇的Winnie亦不怕醜化成「程大嫂」或「火雞姐」,並視張曼玉為目標,「希望好似佢咁,盡力將每個角色呈現畀大家。(同偶像一樣有獨特的歌喉?)只可以話我唱歌唔係特別有天份,但畀心機係有得學嘅,暫時我都唔想分身去其他項目。」


hd