佩服《造美人》參賽者勇氣 強尼沈殷怡練美娟都想整靚自己

  強尼、沈殷怡(Shirley)及練美娟(娟姐)主持ViuTV另類美選真人騷《造美人》,三人都坦承好佩服一班參賽者勇氣,要挖自己最醜一面出來,亦被他們努力改進自己而感動,令他們都想積極提升自己,娟姐更去做割掉聲帶瘜肉手術,搵番把靚聲;而講到整靚自己,強尼想整靚棚牙,Shirley想抽走個雙下巴,娟姐就想抽脂減肥。

撰文:杜淑霞 攝影:譚壹致



服裝:wagamamaplayground(強尼)、suncoo(Shirley)、MARYLING(娟姐)

  強尼認為傳統選美參賽者自信是靚女而參加,今次則剛好相反,「呢個節目女仔係覺得自己醜樣或者唔靚先至嚟,佢要付出嗰個決心係大一百倍,係我覺得自己唔掂,叫人幫我搞搞佢,自信嘅低係好低,你要挖出嚟俾人睇喎!話晒自己有咩唔好,想嚟希望有個改善,真係好赤裸。」

  三人都話去年12月錄影節目開始,受參賽者影響主動去運動減肥,強尼更爆娟姐仲做埋手術割掉聲帶瘜肉,娟姐謂10年前發現,到拍《造美人》令她的起心肝做手術,「呢把聲會有更多可能性,拍嘅角色嘅範疇,做主持,我呢把聲真係可以做啲大騷,以前把聲真係唔出得大場面。」

  講到整靚自己,Shirley就話想整走雙下巴,「我係以呢個雙下巴聞名,再咁樣落去好困擾,但係都知道唔容易,要抽走一定係大手術嚟,聽聞要幾個月因為要動刀,都係算啦!學娟姐話齋食少啲!」強尼亦想整靚棚牙,但怕影響講嘢,「由以前講波都有諗,但我嘅工作係不停咁講嘢,我唔想影響我口齒嘅靈活度,咪一路冇整。」而娟姐自信話塊面冇嘢要整,「有整容醫生同我講,你個樣所有嘢都好好,如果真係要整就抽脂減肥起碼廿磅。」畀強尼笑話,「廿磅夠唔夠先?」


hd