下年結婚行街傾偈冇停過 王曼喜甜笑望女友繞到實

  去年9月,王敏德大女王曼喜(Kayla)宣布與拍拖一年多的攝影師女友Elaine Chen訂婚,婚禮暫定下年9月喺美國舉行,王敏德仲話一諗起個女就快嫁人就唔捨得到想喊。雖然下年先行禮,但Kayla同另一半目前身處美國加州歎世界,見佢除晒口罩四圍去玩,睇見就爽嘞。採訪:梁志明





  Kayla於14年已坦承「出櫃」,王敏德同馬詩慧(Janet Ma)亦冇反對,女友Elaine仲好快融入家中,睇Janet Ma嘅IG有好多大合照,Elaine都有同場,場面好溫馨。補充番少少資料,Elaine身世顯赫,係恒隆地產創辨人之一陳曾燾嘅外孫女。

傾到唔識停

  Kayla同Elaine去美國前,《頭條日報》記者就見到呢Pair準新人去咗太古廣場行街街,兩人冇特別親暱舉動,但好好傾,程度係冇停過,全程互望,你問一句佢答一句,你講完輪到佢講,難怪要結婚。兩人先去萬寧買水,Kayla好口渴,一畀咗錢就除口罩即飲,然後再繞住Elaine手行,再傾住偈行去時裝店,睇Kayla甜笑望住Elaine嚟行,睇路呀。喺時間店行咗半個鐘,Elaine走嗰陣拎住個品牌紙袋,然後兩人再上落扶手電梯行去停車場,準新人貼住行係咁傾,有冇咁多嘢講呀?


hd