• 2022年1月25日 星期二
  • 19º
  • 82%
  • facebook
  • Weibo
  • RSS

贏官司唔安心 指陳潔玲有問題 鍾舒漫獲男友陪出入:佢知我住邊

鍾舒漫(Sherman)與陳潔玲的錢債糾紛終於完結,小額錢債審裁處裁決勝方鍾舒漫可向陳潔玲索償43,560元及訴訟費1,183元。阿Sher導演男友林灝軒(Steve)坦言有如釋重負的感覺,不過,因為經過一年嘅精神騷擾,Steve仍然好唔安心:「雖然判決後暫時冇被滋擾,但陳小姐又知阿Sher住址唔知會做啲乜,o依家我會陪住Sher出入!」

鍾舒漫形容今次事件如同出街被高空擲物擊中,所以冇話錯定啱,遇到就要去處理及學習:「好感謝一班朋友喺背後支持,佢哋比我更嬲;而妹妹鍾舒祺(Sukie)幫我頂咗好多嘢」 Sherman透露跟男友曾經被陳潔玲挑撥離間搞到嗌交幾乎分手,「我同男友患難見真情了解多咗,明白大家只係想保護對方,o依家我哋更加堅韌,共同目標係結婚。」



判決前夕繼續騷擾

  Sherman重提呢件事仍然好無奈:「2020年5月13日我向陳小姐提出拆夥及退錢,6月中佢就Block咗我,到今年7月解封後早午晚凌晨不停發短訊騷擾我哋、我妹妹及Steve 3位朋友,包括莫名其妙追討我存倉費。佢仲喺自設嘅和頭酒飯局中偷影,誣衊我同妹妹做X,收幾千蚊去陪酒飯局;另又指Steve食「軟飯」、入侵佢email,呢一年佢帶咗好多破壞畀我哋,好多證據畀外界睇到佢係乜人,亦都還我哋一個清白。佢講大話講到好投入,從『搶咪事件』、早午晚凌晨send訊息都顯示到佢係情緒不穩,如果佢真心道歉我會原諒佢,不過至今都睇唔到,喺判決前夕我仲不停收到佢轟炸訊息,而8月25號審訊時佢衝入嚟我哋休息室破口大鬧Steve『食軟飯』,當日又喺法庭上偷拍我哋,畀保安阻止。」

疑暗戀Steve撩SP

  Sherman認為成件事係陳小姐對兩人有執念,尤其係對Steve:「其實佢一早退股離場,根本同呢次金錢糾紛冇關,但佢咬住Steve唔放,鍾意點鬧就點鬧,我懷疑佢暗戀Steve,可能Steve畀唔到成功感佢,佢呢種人希望全世界成為佢裙下之臣。」忍咗好耐嘅Steve也開腔:「我識咗佢只有幾日,平安夜當日佢傳曖昧短訊flirt我,話『你知唔知咩叫好睇唔好食?』、『咁你今晚會唔會發綺夢…』。佢又試過喺食飯期間問我『有冇諗過SP?』、『冇得搞嘢真係唔得』,我一直強調自己有女朋友,而佢當時亦同o依家嘅老公謝趠汎(Victor)拍緊拖。」本想低調處理的Steve被陳小姐自編自演「drama」煩足一年:「不過,我都讚佢夠持久力嘅,我真心希望佢可以放低對我嘅執念,畢竟佢已經嫁咗人,尊重佢老公好啲!」至於陳潔玲回覆本報解釋之前不停傳短訊原因:「我希望佢可以正面回覆我,而唔係背後做啲偷雞摸狗嘅事。」

採訪:方騫平 攝影:葉君海 場地:The Wave


hd