女友衰多口 同10億老友旨呈拖狗3人行 Stanley跟Alina 拍拖轉玩低調

        人氣男團MIRROR今年橫掃娛樂圈,不過經理人花姐好開通,從未對一班吸金親生仔落「禁拖令」,「大表哥」邱士縉( Stanley ) 跟拍拖4年、參加過《全民造星III》 的長腿女神李炘頤(Alina)尤其愛得無保留,早前更拍片自爆搬屋同居,女方之後亦曾經在IG疑為男友出頭大呻「幫人推走晒啲job」而惹出小風波。事隔幾個月Alina明顯態度有變,兩人拍拖時孖富貴老友旨呈玩三人行加兩隻狗遊淺水灣,人多時甚至自動彈開,轉玩低調。採訪:張詠森

        跟隊友Edan趕拍ViuTV劇《i.SWIM》的Stanley難得有空檔,日前便跟女友在淺水灣拍拖,不過並非二人行,而是多了電燈膽,曾參加《造星III》,母親有10億身家的富二代鄺旨呈,有錢仔仲帶住一對牧羊狗「陪拍拖」。由於當日是假期,淺水灣人多,Stanley雖然打扮簡單又戴住口罩,但貴為MIRROR的「肌肉擔當」,區區口罩點會阻到佢嘅光芒,有眼利粉絲埋身求合照,在旁的Alina識做彈開睇手機,不過影完相,兩人未有合體,反而自動保持距離,跟早前自爆同居甜到漏親密舉動大大不同。而Alina更全程拖住老友其中一隻牧羊狗,跟同行拖另一隻愛犬的旨呈反而更像一pair。不過回程去攞車,行到商場角落見冇乜人,Stanley即暖男上身,用手機幫女友影靚相,之後再孖住一齊睇效果。



旨呈做司機送走兩人

  其實,自從7月中在IG限時動態爆出「到底一間公司可以有幾好,明知人哋連飯都就嚟無得食,仲幫人推走晒啲job,又或者將個job轉俾其他人,我覺得真係好amazing㗎。」 接着花姐也以「唔知咩事。」回應事件並坦言「唔合適會推job,所以要溝通。」經一事長一智,女友識分莊閒,明白低調拍拖好處多,故兩人離開時,也由旨呈做柴可夫揸七人車送兩人回家。

鏡仔拍拖通常好低調

  MIRROR成員好聽經理人花姐話,將最真實一面呈現給大家,故成員大都公開女友身份,不過拍拖就好低調,好少公開放閃,話晒偶像派。如陳瑞輝(Frankie)跟舞蹈員女友Hei拍拖13年,是名副其實癡心情長劍。柳應廷(Jer)早在比賽時已經公開有個拍拖5年的文青女友Kelly,專一形象獲加分。楊樂文(Lokman)女友Luxi曾接受訪問,做dancer的她十分支持Lokman參加比賽,自然被鏡粉接受。而陳卓賢(Ian)跟盧慧敏(Amy Lo)拍拖一年,兩人都愛得低調。

hd