「最強老竇」鄭嘉穎有計速拆彈 陳凱琳當街跪地o氹大仔

  陳凱琳(Grace) 18年嫁給年齡相差22年鄭嘉穎後,三年抱兩,一家四口經常在社交平台分享開心片段,Grace婚後停工專心湊仔,跟老公約定「唔使開工就要幫手」。日前,一家三口及一對母子朋友在街等上uber,Grace為o氹仔不惜當街「跪地」,但都不及最強老竇鄭嘉穎有計,一個汽球已經令大仔鄭承悅(Rafael)開心晒。 採訪:梁志明

  自從今年6月主持完節目《日日媽媽聲》後,陳凱琳再度回歸屋企,繼續照顧一對仔,暫時休息在港的鄭嘉穎,亦兌現承諾陪玩陪去街,早前Grace就分享老公跟仔仔踢波片,網民更大讚老竇識做勁有戲,承悅會以為自己踢入一球世界波。



囝囝黐老竇

  在家陪仔,鄭嘉穎日前又孖Grace帶大仔行街shopping,在銅鑼灣街頭等上uber的十多分鐘,2歲半大仔已經等得唔耐煩,突然甩開媽咪想行出馬路,好彩Grace動作快即時跪地攬實,見阿仔冇晒心機,鄭嘉穎立即出手幫老婆,跟仔仔講完幾句,再將手中汽球綁在承悅小手後,o氹得仔仔立即生猛晒。

  鄭嘉穎有計拆彈快,之後便抱住承悅上車。而Grace亦自動波一個人坐前座,等仔仔乖乖黐住老竇坐車返屋企。


hd