• 2022年1月18日 星期二
  • 17º
  • 81%
  • facebook
  • Weibo
  • RSS

拍劇攰到變人乾爆晒瘡 譚俊彥開到口想攞視帝

  譚俊彥(Shaun)於首部擔正的台慶劇《換命真相》中的演技獲網民讚賞,加上撞樣《魷魚遊戲》的李政宰,個名無啦啦成為熱搜,仲成為今年視帝黑馬。Shaun恨獎恨到出口:「我最實際,只想奪獎之後工作穩定啲,o依家養兩個小朋友好貴,名利反而唔重要,我呢個成熟年紀冇咁易被沖昏頭腦。」採訪:方騫平 攝影:張詠森





  今年TVB四大台慶劇宣傳相中,譚俊彥拍住鄭嘉穎及馬國明企喺第一排中間位,Shaun兩公婆睇到都好驚喜:「老婆話我喺TVB 6年,終於有機會企喺中間喇!都開心嘅,觀眾一步步睇到我唔同嘅一面,當然都有啲人好主觀嘅,一世都彈我冇乜表情,又成日話係爸爸狄龍安排晒(工作),佢都退咗休咁多年啦!」

視帝睇好張振朗

  Shaun每年都有份爭奪視帝,坦言有憧憬過上台領獎畫面:「我梗係想自己得啦,食住《魷魚遊戲》係會帶嚟親切感嘅。不過,對手張振朗呼聲都好高,佢除咗進步好快,仲係TVB訓練班出身,o依家公司好需要年輕一代演員嚟承接,至於視后我私心係黃智雯。」讚完張振朗,Shaun再出力為自己拉票:「拍《換命》時我同朱敏瀚疊住拍《拳王》,我哋一Cut機就舉啞鈴,開工前日日跑步操肌,加上要照顧家庭,根本冇時間休息,當時攰到好似人乾咁,真係用意志力嚟撐住,嗰時捱壞咗身體,搞到荷爾蒙失調係咁爆瘡,呢啲真係TVB男主角嘅通病,前幾日我見到有兩劇在身嘅袁偉豪塊面爆瘡就好心痛,因為我哋感受到嘅嘢,外邊人未必感受到,所以我好錫呢班兄弟姊妹。」


hd