薛家燕想請蔡卓妍同男友落場打牌 林盛斌爆黎諾懿牌品唔好 

  由薛家燕、林盛斌(Bob) 、鄭衍峰、戴祖儀、吳若希主持嘅TVB遊戲節目《麻雀鬥室三缺一》喺下周1晚(29日)開始播出,阿Bob爆黎諾懿牌品唔好;家燕姐讚馮盈盈太「高」章法變身「站長」;而陳敏之最迷信,竟着「紅底」嚟助旺自己。她笑言最想請埋蔡卓妍同「百億麻將館太子爺」石恆聰上節目玩吓。採訪:方騫平 攝影:葉君海

  「曾總」曾志偉獲升「曾總」(TVB總經理)後拍板製作嘅《麻雀鬥室三決一》,招攬一班打廣東牌將友,邊玩遊戲邊跟藝人嘉賓過招,薛家燕、林盛斌話遊戲好刺激,大家要喺座位轉移、打透明麻將、抽上、下家牌等遊戲中食到胡,唔係咁容易。



  阿Bob讚張頴康夠機警又好運贏到4000幾蚊獎金暫時領先;至於黎諾懿手氣較差打到發脾氣,阿Bob說:「聽啲高手話,笑住打麻將啲牌會愈摸愈靚;諾懿成晚都面黑黑,就算叫胡都食唔出,所以佢好無奈話『好似經歷人生起伏咁。』」家燕姐建議阿Bob搵埋石恆聰跟阿Sa一齊落場。

  家燕姐較少打牌:「最難忘細個時同任姐(任劍輝)拍戲,任姐怕我會成日眨眼阻佢收工去打牌,於是叫我埋去話畀200蚊我買嘢食,當年200蚊係巨額,我即時嚇到瞪大對眼,咁就順利拍完喇!」阿Bob記得小時候跟同學打牌時夾埋細佬出千:「細佬睇晒3家牌之後坐喺我隔離,然後伸手喺我大髀度打手勢,但好快被揭穿咗。」


hd