• 2022年1月29日 星期六
  • 17º
  • 76%
  • facebook
  • Weibo
  • RSS

古仔拍《九龍城寨》最Like懷舊雜誌 洪金寶談阿倫桃色風波:網上好多嘢唔信得

        由鄭保瑞執導的《九龍城寨•圍城》昨日舉行開鏡儀式,洪金寶與古天樂再度合作,他笑指古仔進步變成老手,又搞笑指今次有打戲,但現在連說話都吃力。對於譚詠麟被爆在內地「搭上粉絲」,洪金寶直言近期甚少聯絡,並指網上好多嘢不可信。
古天樂(古仔)、洪金寶、任賢齊、林峯、劉俊謙及黃德斌等昨出席新戲開鏡儀式。古仔笑言在戲中會打得好甘,並跟林峯有較多對手戲,而這部電影以男演員為主,陽剛味較重,所有參演的演員都好辛苦,因為用了一年時間去練打,古仔說:「我戲啲動作好似旋風咁快,但OK啦!」對於劇組重新搭建九龍城寨佈景,古仔笑言每日置身拍攝現場都好開心,因為擺放了好多80年代的雜誌,睇番覺得好懷舊。
洪金寶自嘲被錢打動再拍戲
  洪金寶與古仔繼《殺破狼•貪狼》後再度合作,洪金寶笑指古仔進步不少,現在已變成老手,不過今次自己都有些武打戲。問到拍打戲會否吃力?他搞笑謂現在跟大家說話都吃力。問到導演如何打動他演出?他笑說:「畀錢就打動到我啦!」提到最近有指譚詠麟搭上內地粉絲,問到可有聯絡?洪金寶說:「呢排少啲,我啱啱由上海返嚟五日。(可會相信阿倫搭上粉絲?)我唔知啦!好多嘢唔信得㗎,網上好多人又話我49年出世、又話我前妻點樣,拎第二個女人張相話係我前妻,咁你話信唔信呀?又話洪金寶老、成龍好老,講嗰個人唔會老,係呀!因為佢會好快『釘』。」
林峯被古仔小齊輪住打
  首次跟林峯合作的任賢齊大讚對方努力,為了今次演出而不停操練,一星期操練五日,所以好期待對方的打戲。他說:「平時見佢風流倜儻、好瀟灑,今次見佢身形鋼條咁好實淨。」林峯則笑謂在戲中不刻意騷肌,戲中會被小齊及古天樂輪流打,他說:「基本上每個角色都有機會打我,因為我貫穿成部戲,所以由頭打到尾,今次有拳腳打、撞車、跳樓,總之就飛天遁地。」問到可有受傷?他坦言少不免,每日都會揩花,開拍前接受訓練了個幾月,他說:「每一日練三個鐘,第一日我仲練到差啲嘔,但辛苦都值得。」
  電影將拍攝至農曆新年,林峯要與太太張馨月和女兒「格格寶」相隔兩地,「o依家每日視像,(個女會唔會唔認得你?)唔會,一見到我就叫爸爸,冧到幾辛苦都冇所謂。」


■籌備多時的《九龍城寨•圍城》終於開鏡,將拍攝到農曆新年。
■籌備多時的《九龍城寨•圍城》終於開鏡,將拍攝到農曆新年。
■洪金寶與古仔拜神時不停傾密偈。
■洪金寶與古仔拜神時不停傾密偈。
■《九龍城寨•圍城》集合一眾陽剛味重的男演員演出。
■《九龍城寨•圍城》集合一眾陽剛味重的男演員演出。
■小齊大讚林峯操得好弗。
■小齊大讚林峯操得好弗。
■林峯為免髮型曝光,故戴上帽子出席拜神儀式。
■林峯為免髮型曝光,故戴上帽子出席拜神儀式。



hd