任睇No.1
  • 26º
  • 94%
  • 2022年5月27日 星期五

《青春本我》後Felix望演癲佬 Archie Steven想挑戰做古惑仔

「聲夢」Archie(冼靖峰)、火雞(Steven、孫漢霖)和Felix(林智樂)在《青春本我》齊演學生,首次拍劇他們大呼過癮,仲大爆拍攝時有不少趣事。三人雖然對唱歌興趣較大,但有機會都想繼續嘗試演戲,Felix望有機會演癲佬角色,而Archie和火雞對古惑仔角色特別有興趣。 採訪:杜淑霞 協力:秦詠姿 攝影:葉君海、沈健程
髮型:Torres Pang @via il colpo(Steven&Felix)
化妝:King Yip(Archie)、Mavis Chan(Steven)、 Wasabi Cheung(Felix)@Kings Makeup

劇中Felix和火雞家庭背景有天壤之別,Felix富有到堅離地,而火雞就要靠獎學金入讀名校,不過他們笑指現實中兩種生活都未試過。Felix怕演唔好開劇前仲搵老師惡補演技,而火雞因拍劇第一次見識鐵皮屋,「以前真係冇機會參觀過裏面個結構,原來都有冷氣嘅。」

三人中得Archie有感情戲,他覺得跟Lolita(蔡愷穎)談情最難拿捏,「雖然有感情線,但乜都冇發生過,我哋唔需要對戲O添!(Felix:因為已經係!)你唔好亂講嘢,所有誤會都係咁樣爆出嚟!我哋兩個啲戲係冇乜對白,所以唔使對戲,但要做到嗰份尷尬,係另一種困難,加上我哋好friend做呢啲仲尷尬,但導演話『就係要你哋尷尬』,我哋每次停機仲會不停咁笑。」

不過三人都認同拍攝過程好開心,又大爆Rock瘀事,「有單笑料,有次Rock坐落張枱冧咗,但係Sherman同Aeren一齊坐都冇事,哈哈!」Archie自爆都心廣體胖,「我唔敢磅,但有日拍拍吓我條校服褲唔係緊咁簡單,係爆咗粒鈕。」雖然他們坦承最愛始終是唱歌,但有機會都想再演戲,Archie和火雞都想演古惑仔,「我想演奸角或者古惑仔嗰啲角色,好似鄭伊健好型。」火雞說:「我都想做黑社會,有人話我唔使點化妝都似黑社會。(Felix:啲人話你似黑社會啲O靚咋!)咁做咗低先有得做高嘛!」而Felix就想演癲佬,「演精神分裂嗰啲角色,多啲發揮空間。」■三人笑指因太熟經常雞啄唔斷,俾導演要求停口。
■三人笑指因太熟經常雞啄唔斷,俾導演要求停口。
■Archie自爆跟Rock在拍劇期間,身形暴脹。
■Archie自爆跟Rock在拍劇期間,身形暴脹。
■Felix要演離地有錢仔,單是講對白節奏已考起他。
■Felix要演離地有錢仔,單是講對白節奏已考起他。
■火雞演基層學生想靠知識改變命運,所以成為「學霸」。
■火雞演基層學生想靠知識改變命運,所以成為「學霸」。
■Archie和Lolita有曖昧感情戲,因太熟反而仲尷尬。
■Archie和Lolita有曖昧感情戲,因太熟反而仲尷尬。

hd