中環IFC外望——前線員工傳搞罷工 渣打︰絕無此事

  當大家聚焦醫護人員罷工行動之際,唔知點解呢幾日網上無端端流傳渣打前線員工又搞罷工,目的話係要渣打回應加強防疫安全措施要求,昨日呢個傳聞就喺面書上大為發酵。正如政府近期大力宣傳,提醒市民並非所有網上信息都係真確,要核實咗先好信。渣打發言人昨亦已澄清「絕無此事」,強調有關網上傳聞及指控並非屬實,該行業務一切如常,並無員工罷工及按章工作。

  發言人又話,銀行一直以客戶及員工的安全及健康為首要考慮,已因應新型肺炎疫情採取了一系列措施,包括安排非緊急或非必要服務的員工盡量留在家中工作、以電話或視像會議取代面對面會議等;暫停部份分行服務,讓分行同事分批放假,減少與外界接觸,而繼續營運的分行已加強清潔消毒,更在部份分行加裝透明屏障,減少員工與客戶的直接接觸。至於員工或其家庭成員曾到訪內地,就需留家自我隔離14天,如員工因此返唔到工,唔會當年假計。同時,該行會為員工量度體溫,又提供三層式口罩及酒精搓手液,員工需戴口罩上班。

富士康設獎金熱線 舉報染病員工

  武漢肺炎肆虐,除了零售及旅遊行業首當其衝之外,工業界也可能受到很大打擊。事關工廠環境擠迫,員工人數眾多,如果一人染病,隨時大批員工受到感染,以至污染產品等。因此,工業界對疫情都嚴陣以待,而生產iPhone的富士康,有報道指更設立舉報熱線,以便第一時間找出高危員工。

  據路透社報道,富士康要求來自湖北省的員工,過完年之後不要返工廠開工,而所有工人每天都要向經理報告健康狀況,如果唔跟指引做,將會受到嚴厲處罰。富士康又設立熱線,等員工可以檢舉不守規矩的同事,告密者仲可以得到200元人民幣獎金。

  講開富士康,佢哋嘅主要客戶蘋果公司,即將推出新一代的廉價版iPhone SE2。不過,如果疫情持續,打亂了工廠運作,將會影響新機的出貨量,所以據聞富士康高層對於過年之後,民工逐部恢復工作的安排,都非常緊張。

高瞻

hd