中環IFC外望——巴斯胡錫進爆罵戰 火藥味濃

  一向語不驚人誓不休的對沖基金名宿巴斯(Kyle Bass),昨日同《環球時報》總編輯胡錫進爆罵戰,一度怒言新冠肺炎應該傳遍共產黨員,更企硬不會為言論道歉。

  一向愛網上發文的胡錫進早前在Twitter抱怨美國援助中國疫情時,物資往往不足料,巴斯見狀發晦氣,話美國應該放棄幫中國,任由病毒傳遍《環時》仝人同所有中國共產黨員。雖然惹火言論好快就刪走,但當胡錫進網上要求巴斯道歉時,巴斯不止拒絕,仲發火話「你哋拉咗、譴責同懲罰武漢英雄,係人類之恥!」又暗諷無人知道李文亮醫生之外,另外七個吹哨人下落,火藥味甚濃。

  巴斯過去一直唱淡香港經濟,曾經講過已經沽空港元,指聯繫匯率最終會脫鈎,又估計今年香港會爆發銀行危機。今次一場罵戰,在內地的知名度相信會大增。

港Yahoo拍賣網5月底告別網友

  曾經嘅網購巨頭亦難敵時代變遷,Yahoo拍賣近日公告,由於業務方向嘅改變,Yahoo拍賣將喺今年逐步停止營運;Yahoo團購及Yahoo Store更係自昨日起就暫時停業,令不少曾在此尋寶的網友唏噓不已。

   Yahoo拍賣網站上顯示,其拍賣會分兩階段結束。第一階段,自3月24日開始,停止貨品上載及買賣,開放貨品資料下載功能,用戶可以喺線上查閱過往嘅問答及買賣紀錄。第二階段,5月底全面停止營運,正式告別香港網友;Yahoo亦感謝用戶多年嘅支持。

  Yahoo團購及Yahoo Store雖然已經停運,但官方就話兩者將會重整及定位,話唔定仲有重見天日嘅時候。若早前透過Yahoo團購平台購買團購嘅優惠券仲未兌換,都唔使擔心,可以根據劵上嘅有效日期,到指定商戶兌換。透過Yahoo Store購買商品嘅用戶,則盡快聯絡商戶安排出貨;如有任何團購優惠作出修改,官方指會以電郵方式通知。

高瞻

hd