任睇No.1
  • 29º
  • 81%
  • 2022年8月8日 星期一

新藝潮畫廊新展覽 曹涵凱青蛙系列可愛

鍾意睇藝術展覽嘅人有福啦!新藝潮畫廊推出全新展覽《土木共情——曹涵凱x香港木庫》,展出曹涵凱合共二十多件陶泥、銅等雕塑作品,佢嘅作品多數係透過人與動物嘅結合,去探討人生百態及真理,今次仲有全新嘅青蛙系列。

曹涵凱喺陶藝上被形容有一種原始嘅味道,今次係佢近年較大規模嘅全面展覽,作品包括全新嘅青蛙系列,包括《嬉戲》、《貪婪》、《依靠》等,形體姿態生動可愛;其他動物造型作品如《嬰兒貓》、《鹿》等,想像力豐富,恍如森林精靈靜靜地玩耍、或優雅地步行!

展覽亦會展出「香港木庫」多件木材設計作品,全部以本地木材,如樟木、荔枝木、松木等原木材料創作,造型奇趣,營造一種充滿木香嘅創意空間。展覽由依家至八月十九日,記得要把握時間啊!

hd