【港航陷財務危機】唔想旅行泡湯?即睇自救方法!

臨近聖誕旅遊旺季,香港航空卻因長期陷財困,被空運牌照局公開警告,如未能於限期或之前根據牌照局的要求改善財政狀況,有機會撤銷其牌照,令買晒港航機票嘅旅客十分徬徨!雖然有消息指有新投資者出現,港航或可暫逃被釘牌嘅厄運,不過都係諗定有咩方法自救穩陣啲!

港航營運多條日本線,亦有南韓及台北班機,都係深受港人喜愛嘅旅遊熱點,唔只吸納大批自由行旅客,同時係唔少旅行社嘅合作對象。無論你係自由行定報咗團,除咗不時留意港航同有關部門發放嘅訊息外,喺購買旅遊保險時,也要留意保單嘅保障範圍,因為部分唔會涵蓋機票賠償。買旅保時,最好買包含航空公司倒閉的賠償保障,仲要留意清楚條款細則。

參考甘泉倒閉經驗

一旦港航被釘牌,喺死線即12月7號後出發嘅旅客,政府會要求其他航空公司提供機位,再由港航支付相關費用。大家亦可參考返2008年多次傳出出現財困嘅甘泉航空,最終喺同年4月倒閉嘅資料,當時正值大批留學生返英、澳等地開學嘅高峰期,所以唔少傳統航空公司都即時提供特惠機票協助疏導旅客。

不過今次遇上長假期旅遊旺季,各航空公司嘅機位供應十分緊張,擔心佳節外旅計劃泡湯,可以搵定其他機票作後備,編者今日在機票格價網站見到暫時12月21至26號由香港直飛東京、大阪或台北等熱門旅遊點都仲有唔少機位,不過要早去晚返價錢就當然貴一截啦!

2019年12月21至26日(直航)

香港 - 東京 (成田機場)

香港快運 $6228起/位

ANA $8010起/位

國泰航空CX $8677起/位

香港 - 大阪(關西機場)

樂桃PEACH $4048起/位

香港快運 $6283起/位

ANA $7099起/位

國泰航空 $7906起/位

香港 - 台北(桃園機場)

長榮航空 $2257起/位

國泰航空 $2435起/位

中華航空 $2380起/位

Photo Source:港航網站、星島圖片庫


hd