健談馬事——將悅相對更值博

  第四場一班千六米。論銳氣,幾隻重磅馬都較輕磅馬強,只有「將悅」算是當銳輕磅馬,前仗負超輕磅贏同程,上仗遇上「嘉應之星」及「川河尊河」,面對高半級之馬,依然跑得好,拍住再同場「百步穿雲」,分列三、四名。今次再遇後駒,由平磅變受讓十二磅,若認為「百步穿雲」係機會馬,「將悅」點解唔係?還相對更值博呢!

  第五場四班千八米。「龍戰士」落四班後跑三次,接連輸近,前仗輸在陳嘉熙騎唔郁,上仗換莫雷拉,轉彎前遇變奏局勢,困到想變都無得變,既無用力,更非真輸。今次隔三周縮程千八,換梁家俊,預期一定騎得起,亦唔會變得偏熱唔值博。

子健

hd