雄深雅健——一次亂跑 日後目標

  上篇寫,馬會競賽小組應更重視騎師的早段騎法,好過雞蛋裏挑骨頭。最近「鵲橋飛渡」、「紀利雄星」等應搶唔搶的例子,還有多的是。就上述兩駒,賽後騎師都有被查詢,循例一問一答,既不質疑,更無強硬措詞應對。

  得個「睇」,或得個「估」字的我們,完全無計。估馬匹會放頭,開閘後,睇住鞍上人唔放,焉不火滾?

  每次賽後或賽前做功課,都有一大堆馬,不是應放唔放,就是可楔偏不楔,鞍上人順其自然走外疊!一個人做功課,點睇得這麼多?賽後先做一次,可避免於賽前一兩日才臨急抱佛腳,減低做唔切、做唔齊的問題,同時亦會較快找到所謂的「目標馬」。

  馬匹一次亂跑,但不會次次亂跑,當執番正跑法,就是馬匹變身之時。

  大家不妨多留意巴度、賀銘年及蔡明紹騎過輸過的馬匹,夠膽講,從中一定搵到目標馬、跟進馬。

子健


hd