B女靚馬——當家猴王盃賽主角

  今日係國慶大日子,第八場舉行三級賽國慶盃,我就鍾意「當家猴王」,佢兩次贏馬都係跑一千米,上季亦贏過直路賽,路程性能有根有據,今次繼續由贏馬拍檔何澤堯執韁,絕對信得過。賽前試閘所見,此駒主動性強,最終更勝出大閘,狀態弗到漏,今仗抽埋靚檔,相信有機會一出即勝。同場我要埋「錶之未來」同「跳出世界」。

  我另一心水係第二場「龍來了」,佢今次賽前試咗兩課大閘,在從化一課走勢討好,沿途貼欄順走,姿態輕鬆;最近一課試谷閘,過終點後猶有餘勁,質新馬又進一步。觀乎近期晨課,周俊樂連朝摸實此駒操試,人馬備戰大半個月,誠意百分百。由於今次角逐田草A欄,所以「龍來了」即使大外檔,相信影響亦有限。同場我會揀埋「皇者精芯」同「勁加加」。





B女


hd