B女靚馬——韋小寶備戰顯誠意

  第三場四班二千米。我揀「紅麗舍」做重心,睇番佢上仗跑谷草千八,早段留得比較後,但在對面直路突然發力,直至出彎後仍猶有餘勁,結果都能夠保住第四收獎金,表現實在唔錯。今場加程跑二千更加合適,因為本身後勁強橫,今次亦負輕磅,只要早段留放拿捏得宜,好有機會重開勝利之門,同場我要埋「翡翠綠」同「一舖成名」。

  第七場一班千四米。「韋小寶」今季仲未贏馬,不過成績並唔差,出賽三次獲得一季兩殿,次次都收獎金,表現準繩之餘,最緊要熱身足夠,今次賽前又再試大閘催谷,備戰工夫做到加零一。近期晨課見佢非常生猛,身形亦好靚,今次又由騎慣騎熟的周俊樂執韁,我對呢個組合好有信心。其實此駒上仗在直路前半段受弱,輸得非常唔抵,今場只要發揮順利,照計有權補中頭馬。同場我要埋「佳運財」同「銀馳」。



B女

hd